پی ٹی آئی رہنما عبداللہ طاہر کے قتل کی تحقیقات میں اہم انکشاف
لاہور: پاکستان تحریک انصاف (پی ٹی آئی) کے رہنما عبداللہ طاہر کے قتل کیس کی تحقیقات میں اہم پیش رفت سامنے آئی ہے۔
جیو نیوز کے مطابق پولیس کی تحقیقات میں انکشاف ہوا ہے کہ ملزمان نے عبداللہ طاہر کے قتل سے قبل ڈرون کے ذریعے ریکی کی، جبکہ مقتول کے ڈرائیور کو ایک خاتون کی مدد سے مبینہ طور پر ہنی ٹریپ کیا گیا۔
پولیس کے مطابق ملزمان کی ساتھی خاتون نے ایک سوشل میڈیا ایپ کے ذریعے عبداللہ طاہر کے ڈرائیور سے رابطہ کیا۔ واردات کے روز خاتون کلینک پہنچی، جہاں ڈرائیور اور ملزمہ کے درمیان ویڈیو کال ہوئی۔
تحقیقات کے مطابق ویڈیو کال کے دوران ملزمان نے عبداللہ طاہر کی کلینک میں موجودگی کی تصدیق کی، جس کے بعد مبینہ طور پر قتل کی کارروائی کو آگے بڑھایا گیا۔
واضح رہے کہ پی ٹی آئی رہنما عبداللہ طاہر کو چند روز قبل لاہور کے علاقے گلبرگ میں قتل کردیا گیا تھا۔ پولیس کی جانب سے واقعے کی مزید تحقیقات جاری ہیں۔
