شام کی عدالت کا مفرور سابق صدر بشار الاسد کو سزائے موت کا حکم
دمشق: شام کی عدالت نے مفرور سابق صدر بشار الاسد کو ان کی غیر موجودگی میں سزائے موت سنا دی۔
غیر ملکی خبر ایجنسی کے مطابق عدالت نے بشار الاسد دور کے سکیورٹی عہدیدار اور ان کے کزن عاطف نجیب کو بھی سزائے موت سنائی۔ سزا سنائے جانے کے وقت عاطف نجیب کمرہ عدالت میں موجود تھے اور ملزمان کے لیے مخصوص لباس پہن رکھا تھا۔
عاطف نجیب شامی فوج میں بریگیڈیئر جنرل کے عہدے پر فائز رہ چکے ہیں۔ 2011 میں بشار الاسد کے دورِ حکومت میں وہ صوبہ دارا کی پولیٹیکل سکیورٹی برانچ کے سربراہ تھے۔
ان پر دارا میں حکومت مخالف مظاہروں کے خلاف کریک ڈاؤن میں کردار ادا کرنے کا الزام عائد کیا گیا تھا، جس کے بعد شام میں شروع ہونے والی خانہ جنگی نے ملک کو طویل عرصے تک اپنی لپیٹ میں لیے رکھا۔
شامی عدالت کے مطابق بشار الاسد کو پیشگی منصوبہ بندی اور جان بوجھ کر قتل کے الزامات میں سزائے موت سنائی گئی ہے۔
