کراچی: لاہور سے لاپتہ 14 سالہ بچہ بحفاظت بازیاب
لاہور سے لاپتہ ہونے والے 14 سالہ بچے فہیم کو کراچی سے بحفاظت بازیاب کرلیا گیا۔
پولیس کے مطابق تھانہ آرٹلری میدان کی بروقت کارروائی کے نتیجے میں لاہور سے لاپتہ ہونے والے بچے کو کراچی سے تلاش کیا گیا۔ ابتدائی معلومات کے مطابق بچہ امتحانات میں ناکامی پر دل برداشتہ ہوکر گھر سے نکل گیا تھا اور لاہور سے کراچی پہنچ گیا۔
بچے کے والدین نے لاہور میں گمشدگی کا مقدمہ درج کرایا تھا، جس کے بعد پولیس نے مختلف شہروں میں بچے کی تلاش شروع کردی تھی۔
پولیس حکام کے مطابق بچے کو بحفاظت بازیاب کرنے کے بعد ضروری قانونی کارروائی مکمل کی گئی اور اسے والدین کے حوالے کردیا گیا۔
بچے کی بازیابی پر والدین نے خوشی کا اظہار کرتے ہوئے ڈسٹرکٹ ساؤتھ پولیس کراچی، ایس ایس پی مہزور علی اور ایس ایچ او تھانہ آرٹلری میدان کامران اشعر کا شکریہ ادا کیا۔
ترجمان ڈسٹرکٹ ساؤتھ پولیس کا کہنا ہے کہ شہریوں کی جان و مال کے تحفظ کے لیے پولیس اپنی ذمہ داریاں بھرپور انداز میں انجام دے رہی ہے۔
