لاہور: شالیمار ایکسپریس 14 اگست سے دوبارہ بحال کرنے کا فیصلہ
سیلاب کے باعث لاہور اور کراچی کے درمیان گزشتہ دو ہفتوں سے بند شالیمار ایکسپریس کو 14 اگست سے دوبارہ چلانے کا فیصلہ کرلیا گیا۔
پاکستان ریلوے کی پریمیم ٹرین شالیمار ایکسپریس پہلے براستہ فیصل آباد کراچی جاتی تھی، تاہم اب اس کا روٹ تبدیل کردیا گیا ہے۔ ٹرین اب لاہور سے براستہ ساہیوال کراچی جائے گی۔
ریلوے حکام کے مطابق شالیمار ایکسپریس کے لیے پانچ اسٹاپ بھی مقرر کیے گئے ہیں، جن میں کوٹ لکھپت، رائے ونڈ، اوکاڑہ، ساہیوال اور صادق آباد ریلوے اسٹیشن شامل ہیں۔
سیلابی صورتحال کے باعث ٹرین سروس متاثر ہونے کے بعد اس کی بحالی سے لاہور اور کراچی کے درمیان سفر کرنے والے مسافروں کو دوبارہ سفری سہولت میسر ہوگی۔
