کیریئر آگے بڑھانے کیلئے مخصوص شخص کے پاس جانے کا کہا گیا،سومی علی کا انکشاف
کیرالہ: ملیالم فلم انڈسٹری میں خواتین کے استحصال کے حوالے سے ہیما کمیٹی کی رپورٹ کے بعد، جنوبی بھارت کی اس فلم انڈسٹری میں بدسلوکی کے واقعات سامنے آنے کے بعد کئی اداکاراؤں نے اپنے ذاتی تجربات شیئر کرنا شروع کر دیے ہیں۔ اس سلسلے میں ماضی میں سلمان خان کی گرل فرینڈ سمجھی جانے والی اداکارہ سومی علی نے بھی کھل کر بات کرتے ہوئے انکشاف کیا ہے کہ انہوں نے بھی فلم انڈسٹری میں بدسلوکی کا سامنا کیا۔
سومی علی نے اپنے ایک انٹرویو کے دوران کہا کہ انہوں نے ذاتی طور پر #MeToo واقعات کا سامنا کیا، اور انہیں یہ وارننگ دی گئی کہ اگر وہ اپنے کیریئر کو آگے بڑھانا چاہتی ہیں تو انہیں ایک مخصوص شخص کے پاس جانا ہوگا۔ انہوں نے مزید کہا کہ انہوں نے انتہائی شرمندگی کے مناظر دیکھے ہیں، اور خواتین کو صبح سویرے ہوٹلوں سے پریشانی کے عالم میں باہر آتے دیکھا ہے۔ ان خواتین کو نامور افراد، بشمول اداکاروں، نے استحصال کا نشانہ بنایا۔
سومی علی نے کہا کہ استحصال کرنے والوں میں ایسے لوگ بھی شامل ہیں جو تہذیب کے ساتھ اپنی خاندانی زندگی گزارتے ہیں۔ ان کا کہنا تھا کہ ان کا تجربہ صرف ایک کہانی ہے۔ انہوں نے کہا کہ دنیا بھر کی فلم انڈسٹری میں خواتین کے ساتھ جہاں بھی کچھ غلط ہوتا ہے یہ قابل مذمت ہے ۔ انہوں نے مطالبہ کیا کہ نظام میں تبدیلی کی اشد ضرورت ہے۔
سومی علی نے امید ظاہر کی کہ ہیما کمیٹی کی رپورٹ انڈسٹری کے لیے ایک بیداری کا باعث بنے گی، تاکہ خواتین اور مردوں کی حفاظت کی جا سکے جو بدسلوکی کا شکار ہوتے ہیں، اور وہ بغیر کسی خوف کے اپنے کام جاری رکھ سکیں۔
