معروف بھارتی پنجابی گلوکار دلجیت دوسانجھ نے کہا ہے کہ وہ خود کو اتنا بڑا گلوکار نہیں سمجھتے کہ نصرت فتح علی خان جیسا گا سکیں۔
بھارتی گلوکار و اداکار دلجیت دوسانجھ نے حال ہی میں ایک کنسرٹ کے دوران لیجنڈ گلوکار نصرت فتح علی خان کی مقبول قوالی ’’سانسوں کی مالا‘‘ پر پرفارم کیا تھا۔
اپنی پرفارمنس کے حوالے سے انسٹاگرام لائیو کے دوران بات کرتے ہوئے دلجیت دوسانجھ نے ایک صارف کے کمنٹ کا جواب دیتے ہوئے کہا کہ وہ خود کو اتنا بڑا گلوکار نہیں سمجھتے کہ نصرت فتح علی خان کی موسیقی کے ساتھ حقیقی انصاف کر سکیں۔
دلجیت دوسانجھ نے بتایا کہ ان کی یہ پرفارمنس عظیم قوال نصرت فتح علی خان کے لیے محبت اور عقیدت کا اظہار تھی۔ انہوں نے اپنی پرفارمنس میں ہونے والی ممکنہ غلطیوں پر معذرت کرتے ہوئے اعتراف کیا کہ نصرت فتح علی خان کی دھن پر گانا انتہائی مشکل ہے۔
واضح رہے کہ دلجیت دوسانجھ پہلے پنجابی فنکار ہیں جنہوں نے لندن کے ویمبلی اسٹیڈیم میں پرفارم کیا۔ انہوں نے اپنے ’’آورا ورلڈ ٹور‘‘ کے سلسلے میں ویمبلی اسٹیڈیم میں ہزاروں مداحوں کے سامنے پرفارم کیا، جہاں انہوں نے نصرت فتح علی خان کی معروف قوالی ’’سانسوں کی مالا‘‘ بھی پیش کی۔
ویمبلی میں ہونے والے کنسرٹ کے دوران دلجیت دوسانجھ نے بھارتی مداحوں کے لیے ایک اہم اعلان بھی کیا اور بتایا کہ وہ 21 نومبر 2026 کو احمد آباد کے نریندر مودی اسٹیڈیم میں پرفارم کریں گے۔
