کے جی ایف فلم سے نام کمانے والے اداکار کی سالگرہ کا پوسٹر لگاتے ہوئے تین افراد کرنٹ لگنے سے ہلاک ہوگئے۔ اداکار کے 3 مداح ان کی سالگرہ کا پوسٹر لگاتے ہوئے کرنٹ لگنے سے ہلاک ہوگئے ہیں۔بھارتی میڈیا کے مطابق کناڈا فلموں کے مشہور اداکار یش کی سالگرہ پر مشہور اداکار کے تین مداح سالگرہ کا پوسٹر لگانے کھمبے پر چڑھے اور کرنٹ لگنے سے ہلاک ہوگئے۔
تفصیلات کے مطابق واقعے کی اطلاع ملتے ہی اداکار یش نے اپنی سالگرہ کے موقع پر ہونے والی تمام تقریبات منسوخ کردیں اور تینوں مداحوں کے گھر جا کر افسوس کا اظہار کیا۔ افسوس کے ساتھ ساتھ اداکار نے تینوں فینز کے اہلخانہ کو مالی امداد بھی فراہم کی۔
میڈیا سے گفتگو کرتے ہوئے اداکار یش نے کہا کہ آپ جہاں کہیں سے بھی میرے لیے نیک خواہشات بھیجیں گے وہ میرے تک ضرور پہنچیں گی انہوں نے کہا کہ اس طرح اپنی جان خطرے میں ڈال کر میرے لیے محبت کا اظہار کرنا کسی کے لیے بھی اچھا نہیں۔انہوں نے مزید کہا کہ اس واقعہ نے میری سالگرہ کو میرے لیے افسوسناک دن میں تبدیل کردیا ہے۔ امید ہے کہ آئیندہ میرے مداح ایسا کوئی کام نہیں کریں گے جس سے ان کو اور مجھے تکلیف پہنچے کیونکہ مداحوں کی تکلیف میری تکلیف ہے۔
