لاس اینجلس آتشزدگی، انجلینا جولی نے متاثرین کیلئے گھر کے دروازے کھول دئیے

کیلیفورنیا:ہالی ووڈ کی مشہور اداکارہ انجلینا جولی نے کیلیفورنیا کے جنگلات میں لگنے والی آگ سے متاثرہ افراد کی مدد کے لیے اپنی رہائش گاہ کے دروازے کھول دیے ہیں۔
کیلیفورنیا کے جنگلات میں بھڑکتی آگ نے بڑی تباہی مچائی ہے، جس کی زد میں آکر لاس اینجلس میں ہزاروں گھر خاک کا ڈھیر بن چکے ہیں۔
انجلینا جولی کا گھر بھی لاس اینجلس میں واقع ہے، لیکن خوش قسمتی سے یہ آگ سے محفوظ رہا۔ تاہم، اداکارہ نے متاثرہ بے گھر افراد کو اپنے گھر میں پناہ دینے کا فیصلہ کیا ہے۔
امریکی چینل سی این این کے مطابق، انجلینا جولی اس سنگین صورتحال میں ہر ممکن مدد فراہم کرنے کی کوشش کر رہی ہیں۔
یہ جنگلاتی آگ لاس اینجلس کی تاریخ کی سب سے بڑی اور تباہ کن آگ قرار دی جا رہی ہے۔ یہ آگ اس علاقے میں بھڑکی ہے جہاں کئی مشہور ہالی ووڈ ستارے رہائش پذیر ہیں۔
لاس اینجلس کی اس ہولناک آگ کی وجہ سے اب تک 10 ہزار سے زائد گھر مکمل طور پر جل چکے ہیں۔ انجلینا جولی کی طرح دیگر مشہور شخصیات بھی آگ کے متاثرین کی مدد کے لیے سامنے آئی ہیں۔
میگھن مارکل اور پرنس ہیری نے بھی انجلینا جولی کی طرح اپنے گھر بے گھر افراد کے لیے کھول دیے ہیں، تاکہ آگ سے متاثرہ لوگوں کو رہائش فراہم کی جا سکے۔