والد کہتے تھے بھارت ماں ہے تو پاکستان اسکی بہن ہے: سنی دیول

سنی دیول کا پاکستان سے متعلق بیان، تاریخی اور ثقافتی رشتے کا ذکر

ممبئی: بالی وڈ کے معروف اداکار سنی دیول نے پاکستان سے متعلق اپنے حالیہ بیان میں دونوں ممالک کے درمیان تاریخی اور ثقافتی تعلق کا ذکر کیا ہے۔

سنی دیول ان دنوں اپنی نئی فلم ’بٹوارا (1947)‘ کی تشہیری مہم میں مصروف ہیں، جو تقسیمِ ہند کے دوران پیش آنے والے تاریخی واقعات پر مبنی ہے۔

فلم 14 اگست 2026 کو پاکستان کے علاوہ دنیا بھر میں ریلیز کی جائے گی۔

فلم کی تشہیری مہم کے دوران ایک صحافی نے سنی دیول سے سوال کیا کہ کیا انہوں نے فلم کی شوٹنگ پاکستان میں کی ہے اور وہ پاکستان، وہاں کے ماحول اور عوام کو کس نظر سے دیکھتے ہیں؟

سوال کا جواب دیتے ہوئے سنی دیول نے کہا کہ فلم کی شوٹنگ پاکستان میں نہیں ہوئی بلکہ اس کی تمام عکس بندی بھارت میں کی گئی ہے۔

اداکار نے پاکستان سے اپنے تعلق کا ذکر کرتے ہوئے کہا کہ ان کے والد کہا کرتے تھے کہ اگر بھارت ان کی ماں ہے تو پاکستان ان کی ماں کی بہن (ماسی) ہے، اس لیے دونوں کے درمیان کسی نہ کسی طرح ایک رشتہ ضرور ہے۔

سنی دیول کے اس بیان کے بعد سوشل میڈیا پر مختلف صارفین نے ان کے مؤقف کو متوازن قرار دیتے ہوئے اس پر اپنی رائے کا اظہار کیا۔