لائف لائن صارفین کے علاوہ تمام صارفین کے لیے بجلی مہنگی

اسلام آباد: نیشنل الیکٹرک پاور ریگولیٹری اتھارٹی (نیپرا) نے مالی سال 2024-25 کی پہلی سہ ماہی ایڈجسٹمنٹ کے تحت بجلی کی فی یونٹ قیمت میں 20 پیسے اضافے کی منظوری دے دی، جو صرف دسمبر 2024 کے بجلی کے بلوں پر نافذ ہوگی۔ یہ اضافہ ڈسٹری بیوشن کمپنیز (ڈسکوز) اور کے الیکٹرک کے تمام صارفین پر لاگو ہوگا، تاہم لائف لائن صارفین کو اس سے مستثنیٰ رکھا گیا ہے۔

نیپرا کے مطابق، ڈسکوز کی جانب سے درخواست پر عوامی سماعت 20 نومبر کو منعقد کی گئی تھی۔ اس سے قبل مالی سال 2023-24 کی چوتھی سہ ماہی ایڈجسٹمنٹ کے تحت صارفین سے 1 روپے 74 پیسے فی یونٹ چارج کیا جا رہا تھا، جو نومبر 2024 تک نافذ العمل رہا۔

مزید یہ کہ نئی سہ ماہی ایڈجسٹمنٹ کے تحت چارج کی جانے والی قیمت سابقہ ایڈجسٹمنٹ سے 1 روپے 54 پیسے فی یونٹ کم ہوگی۔ نیپرا کا کہنا ہے کہ یہ فیصلہ نوٹیفکیشن سے پہلے وفاقی حکومت کو آگاہ کر دیا گیا ہے۔