کیا کھانا پکانے کے لیے استعمال ہونے والے بیجوں کے تیل صحت کے لیے نقصان دہ ہیں؟

اگر آپ سوشل میڈیا استعمال کرتے ہیں، تو آپ نے یہ بات ضرور سنی ہوگی کہ بیجوں سے نکلے کھانا پکانے کے تیل صحت کے لیے خطرناک ہیں اور یہ کئی بیماریاں پیدا کر سکتے ہیں۔ سوشل میڈیا پر موجود کچھ ماہرین غذائیت کا کہنا ہے کہ یہ تیل امراض قلب، ذیابیطس، بلڈ پریشر، جلدی مسائل اور تھکن جیسی بیماریوں کی وجہ بنتے ہیں۔

لیکن طبی سائنس ان دعوؤں کے بارے میں کیا کہتی ہے؟ ماہرین کے مطابق، سوشل میڈیا پر پھیلائی جانے والی باتیں اکثر مبالغہ آمیز اور حقائق سے دور ہوتی ہیں۔

مارکیٹ میں کپاس، سورج مکھی، سویابین، مکئی، کنولا، تل اور مونگ پھلی جیسے بیجوں سے نکالے گئے تیل دستیاب ہیں۔ ان میں "اومیگا 6” چکنائی کا ایک خاص قسم کا تیزاب شامل ہوتا ہے، جسے اکثر تنقید کا نشانہ بنایا جاتا ہے۔

یہ تیزاب انسانی جسم کے لیے ضروری ہے کیونکہ یہ خلیوں کو بہتر کام کرنے اور مدافعتی نظام کو مضبوط بنانے میں مدد دیتا ہے۔ البتہ، سوشل میڈیا پر یہ دعویٰ کیا جاتا ہے کہ اومیگا 6 کا زیادہ استعمال جسم میں سوزش پیدا کر سکتا ہے اور اومیگا 3 کے فوائد کو کم کر دیتا ہے۔

ماہرین کا کہنا ہے کہ بیجوں کے تیل کو صحت کے لیے نقصان دہ قرار دینا درست نہیں۔ مسئلہ تیل کی نوعیت سے زیادہ کھانے کے انداز میں ہے۔ اگر تیل کو بار بار گرم کیا جائے یا زیادہ تلی ہوئی اشیا کھائی جائیں تو یہ صحت کے لیے مضر ہو سکتا ہے۔

طبی تحقیق کے مطابق، اومیگا 6 چکنائی کا مناسب استعمال صحت کے لیے فائدہ مند ہو سکتا ہے۔ یہ جسم میں کولیسٹرول کی سطح کو کم کرتا ہے اور دل کی بیماریوں سے بچاتا ہے۔

بیجوں کے تیل کی تیاری میں ایک کیمیکل "ہیکسین” استعمال کیا جاتا ہے، لیکن پروسیسنگ کے دوران اسے نکال دیا جاتا ہے، اس لیے یہ مضر اثرات پیدا نہیں کرتا۔ تاہم، "ٹرانس فیٹ” جو مارجرین اور گھی میں پایا جاتا ہے، صحت کے لیے واقعی نقصان دہ ہے اور اس سے بچنا ضروری ہے۔

ماہرین کہتے ہیں کہ بیجوں کے تیل کو اعتدال میں استعمال کریں اور سوشل میڈیا کے غیرمصدقہ دعووں پر عمل نہ کریں۔ صرف سبزی، مکھن یا گوشت پر انحصار کرنے کے بجائے متوازن غذا لیں، کیونکہ ہر قسم کی چربی کے اپنے فوائد اور نقصانات ہیں۔

بیجوں کے تیل مکمل طور پر نقصان دہ نہیں بلکہ ان کا صحیح استعمال فائدہ مند ہو سکتا ہے۔ سوشل میڈیا پر پھیلائے جانے والے خوف و ہراس سے بچیں اور اپنی خوراک میں توازن رکھیں تاکہ صحت مند رہ سکیں۔