پنجاب حکومت کا دہشت گردی کے خلاف جدید ٹیکنالوجی کا استعمال،27 کواڈکاپٹرز خریدنے کی منظوری
پنجاب حکومت نے دہشت گردی کے خلاف مؤثر کارروائیوں کے لیے جدید ٹیکنالوجی کے استعمال کا فیصلہ کرتے ہوئے 27 جدید کواڈکاپٹرز خریدنے کی منظوری دے دی ہے۔ یہ فیصلہ پنجاب کی کابینہ کی جانب سے کیا گیا ہے، جس کے تحت محکمہ داخلہ کو کواڈکاپٹرز کی خریداری کے لیے 21 کروڑ 40 لاکھ روپے مختص کیے گئے ہیں۔
ان میں سے 20 سرویلنس کواڈکاپٹرز اٹک، میانوالی، بھکر، لیہ، ڈیرہ غازی خان، راجن پور اور رحیم یار خان کے علاقوں میں نگرانی اور سیکورٹی کے لیے استعمال کیے جائیں گے۔ مزید برآں، میانوالی، ڈی جی خان، راجن پور اور رحیم یار خان کے علاقوں میں مخصوص کارروائیوں کے لیے 7 کواڈکاپٹرز بھی خریدے جائیں گے جو کہ پے لوڈ لے جانے کی صلاحیت رکھتے ہیں۔ یہ کواڈکاپٹرز ایک وقت میں 80 ایم ایم کے دو مارٹر گولے ہدف پر داغنے کی صلاحیت رکھتے ہیں۔
سیکریٹری داخلہ پنجاب نے کہا ہے کہ یہ اقدام دہشت گردوں اور جرائم پیشہ عناصر کے خلاف مؤثر کارروائیوں کو ممکن بنانے کے لیے اٹھایا گیا ہے، اور اس سے کچے کے علاقوں اور سرحدی علاقوں میں قانون کی حکمرانی کو مضبوط کرنے میں مدد ملے گی۔
