حکومت کا 5 اہم وزارتوں اور محکموں کو ختم کرنے کا فیصلہ
اسلام آباد: وزیراعظم شہباز شریف نے پانچ اہم وزارتیں اور محکمے ختم کرنے کا فیصلہ کر لیا۔
انسٹیٹیوشنل ریفارمز سیل جو وزیراعظم کے حکم پر قائم کیا گیا تھا نے اپنا کام شروع کر دیا ہے۔ جن 5وفاقی وزارتوں سے ایک ہفتے میں سفارشات طلب کی گئی ہیں ان میں انفارمیشن ٹیکنالوجی (آئی ٹی)، صنعت و پیداوار،کشمیر امور، سیفران، اور وزارت صحت شامل ہیں۔
وزیراعظم شہباز شریف نے صوبوں کو دی جانے والی وزارتوں کا کردار واضح کرنے کی ہدایت کرتے ہوئے وزیر خزانہ اور رکن قومی اسمبلی بلال اظہر کیانی پر مشتمل کمیٹی تشکیل دے دی ہے۔ دوسری جانب وفاقی کابینہ نے پی ڈبلیو ڈی کو ختم کرنے کی باضابطہ منظوری دے دی ہے، اور پی ڈبلیو ڈی سے متعلق پورے پلان کی بھی توثیق کی گئی ہے۔
وزیراعظم نے بجلی کے بلوں پر فوری ریلیف فراہم کرنے اور وزارتوں کو سولر ٹیوب پر تیزی سے کام کرنے کی ہدایت دی ہے۔ کابینہ کے اجلاس میں ادویات کے اشتہارات ٹی وی، ریڈیو، اور پرنٹ میڈیا پر چلانے کی بھی منظوری دی گئی ہے۔
