لاہور سفاری زو کے اوقات کار میں تبدیلی، یکم اکتوبر سے نئی ٹائمنگز کا اعلان
لاہور : لاہور سفاری زو کی انتظامیہ نے اکتوبر سے سفاری زو کے اوقات کار میں تبدیلی کرتے ہوئے سیاحوں کے لیے نئے ٹائمنگز کا اعلان کر دیا ہے۔ تفصیلات کے مطابق، یکم اکتوبر سے سفاری زو میں سیاح صبح 8 بجے سے رات 8 بجے تک داخل ہو سکیں گے، جبکہ جنرل ایریا اور جنگل سفاری صبح 8 بجے سے شام 6 بجے تک عوام کے لیے کھلے رہیں گے۔
ڈے لائن سفاری اور ایکوریم بھی صبح 8 بجے سے شام 6 بجے تک سیاحوں کو خوش آمدید کہیں گے، تاہم نائٹ لائن سفاری میں سیاح شام 6 بجے سے رات 8 بجے تک شیروں کی مستیوں اور شرارتوں کا لطف اٹھا سکیں گے۔ ڈی جی وائلڈ لائف پنجاب مدثر ریاض ملک کے مطابق، سفاری زو انتظامیہ نے نئے اوقات کار کے مطابق تمام انتظامات مکمل کر لیے ہیں اور سیاحوں کو مکمل سکیورٹی اور سہولیات کی فراہمی یقینی بنائی جا رہی ہے۔
مدثر ریاض نے مزید کہا کہ بدلتے موسموں میں عوام کو قدرت کے حسین مناظر کا نظارہ کرنے کا موقع ملے گا، لہٰذا فرصت کے لمحات کو یادگار بنائیں اور اپنی فیملیز کے ساتھ سفاری زو کا رخ کریں۔
