پاکستان کی اقوام متحدہ سلامتی کونسل کی صدارت قومی وقار کا لمحہ ہے، شاہد آفریدی کا ردعمل

پاکستان کرکٹ ٹیم کے سابق کپتان اور عالمی شہرت یافتہ آل راؤنڈر شاہد خان آفریدی نے اقوام متحدہ کی سلامتی کونسل کی صدارت سنبھالنے پر ملک کو زبردست خراجِ تحسین پیش کرتے ہوئے اسے ’’فخر کا لمحہ‘‘ قرار دیا ہے۔ انہوں نے کہا کہ عالمی سطح پر پاکستان کی یہ نمائندگی اس بات کا ثبوت ہے کہ دنیا پاکستان کو ایک بااعتماد، ذمہ دار اور امن دوست ریاست کے طور پر دیکھ رہی ہے۔

شاہد آفریدی نے اپنے بیان میں کہا، ’’پاکستان کا اقوام متحدہ سلامتی کونسل کی صدارت سنبھالنا ہمارے لیے باعثِ فخر ہے۔ میں عالمی امن اور سلامتی کے لیے پاکستان کی کوششوں کو سلام پیش کرتا ہوں، اور دعا گو ہوں کہ ہماری قیادت اس عظیم ذمہ داری کو احسن طریقے سے نبھائے۔‘‘

واضح رہے کہ پاکستان نے اقوام متحدہ کی سلامتی کونسل کی ماہانہ صدارت منگل کے روز سنبھالی، جو اگرچہ بظاہر علامتی نوعیت کی ذمہ داری سمجھی جاتی ہے، مگر موجودہ عالمی تنازعات، خصوصاً مشرق وسطیٰ، یوکرین اور کشمیر کی صورتحال کے تناظر میں اس کی اسٹریٹیجک اہمیت انتہائی نمایاں ہو چکی ہے۔ پاکستانی دفتر خارجہ کے مطابق، اس مدت کے دوران پاکستان کئی اہم اجلاسوں کی میزبانی کرے گا جن میں عالمی امن، تنازعات کے حل، انسانی حقوق اور ترقی پذیر ممالک کے مفادات کے تحفظ جیسے کلیدی موضوعات پر بحث ہوگی۔