وزیر اعظم کی ہدایت پر نادہندگان کیخلاف آپریشن میں تیزی ، لیسکو نے کتنی ریکوری کر لی ؟

لاہور (ایم وائے کے نیوز ٹی وی) کی نمائندہ طیبہ بخاری کے مطابق وزیر اعظم شہباز شریف اور وزیر توانائی کی ہدایات پر لاہور الیکٹرک سپلائی کمپنی (لیسکو) نے نادہندگان کے خلاف کارروائیاں تیز کر دی ہیں۔ اس اقدام کا مقصد مالی نظم و ضبط قائم رکھنا، بجلی کے واجبات کی بروقت وصولی ممکن بنانا اور ادارے کی مالی پوزیشن کو مستحکم کرنا ہے۔ گزشتہ ایک ہفتے کے دوران ہونے والی کارروائیوں میں لیسکو نے مجموعی طور پر 6 کروڑ 98 لاکھ روپے سے زائد کی ریکوری کی ہے، جو کہ پولیس، رینجرز اور ضلعی انتظامیہ پر مشتمل ڈسکوز سپورٹ یونٹ کے تعاون سے ممکن ہوئی۔

ریکوری میں سے 4 کروڑ 84 لاکھ 60 ہزار روپے 899 رننگ ڈیفالٹرز سے وصول کیے گئے، جبکہ 2 کروڑ 13 لاکھ 40 ہزار روپے 472 ڈیڈ ڈیفالٹرز سے ریکور کیے گئے۔ نادرن سرکل سے 12 لاکھ 80 ہزار، سینٹرل سرکل سے 1 کروڑ 96 لاکھ 50 ہزار، ایسٹرن سرکل سے 2 کروڑ 31 لاکھ 60 ہزار، اوکاڑہ سرکل سے 21 لاکھ 90 ہزار، ساوتھ سرکل سے 16 لاکھ 20 ہزار، شیخوپورہ سرکل سے 13 لاکھ 40 ہزار، قصور سرکل سے 1 کروڑ 93 لاکھ اور ننکانہ سرکل سے 12 لاکھ 60 ہزار روپے کی ریکوری کی گئی۔

چیف ایگزیکٹو لیسکو انجینئر محمد رمضان بٹ نے کہا کہ نادہندگان کے خلاف بلا تفریق کارروائیاں ادارے کی مستقل پالیسی کا حصہ ہیں، کیونکہ لیسکو کی مالی خودمختاری اور صارفین کو بجلی کی بلا تعطل فراہمی ہمارے اولین اہداف میں شامل ہے۔ ان کا کہنا تھا کہ عوام اپنے واجبات بروقت ادا کریں تاکہ نظام پر مالی دباؤ کم ہو اور بجلی کی ترسیل کا عمل متاثر نہ ہو۔ انہوں نے مزید کہا کہ لیسکو اپنے ریکوری سسٹم کو جدید تقاضوں سے ہم آہنگ کر رہا ہے اور ڈیجیٹل پلیٹ فارمز کے ذریعے اسے مزید شفاف اور مؤثر بنانے پر کام جاری ہے۔