چائے سے چیمپئن تک: ذبیح اللہ کی متاثر کن کہانی نے دنیا کو حیران کر دیا

پشاور: ارشد خان عرف "بلیو آئی چائے والا” کے بعد ایک اور پاکستانی نوجوان نے سادہ سی چائے کی دکان سے بین الاقوامی کامیابی کا سفر طے کرکے دنیا کو حیران کر دیا ہے۔ خیبر پختونخوا کے ضلع مہمند سے تعلق رکھنے والے ذبیح اللہ نے محض محنت، لگن اور والدین کی دعاؤں سے لندن کی یونیورسٹی آف ہارٹ فورڈشائر سے ماسٹرز کی ڈگری نمایاں پوزیشن کے ساتھ حاصل کر لی۔

ذبیح اللہ نے اپنی عملی زندگی کا آغاز پشاور کے ایک چھوٹے سے چائے کے ڈھابے سے کیا جہاں وہ والد کے ساتھ کام کرتے رہے۔ انہوں نے بی اے مکمل کرنے کے بعد اقراء نیشنل یونیورسٹی سے اسکالرشپ پر ایم ایس کیا، تاہم کم تنخواہ پر نوکری کی بجائے چائے اور چپلی کباب کے کاروبار کو ترجیح دی۔

میڈیا سے گفتگو کرتے ہوئے ذبیح اللہ نے بتایا کہ سنہ 2019 سے 2023 تک پشاور میں خون پسینے کی کمائی سے کاروبار کیا، جس نے انہیں اعتماد اور پہچان دی۔ اسی دوران ایک طالبعلم کی رہنمائی پر انہوں نے آئیلٹس کی تیاری کی، کامیابی کے بعد لندن کی یونیورسٹی میں داخلہ لیا اور مینجمنٹ سائنسز میں اعلیٰ تعلیم حاصل کی۔

ذبیح اللہ کا کہنا تھا کہ، "مجھے کبھی یقین نہیں تھا کہ میں لندن سے تعلیم مکمل کر پاؤں گا، یہ محض ایک خواب تھا جو آج حقیقت بن چکا ہے۔” انہوں نے مزید بتایا کہ چپلی کباب بنانے کا ہنر بھی لندن میں ان کے کام آیا، جہاں انہوں نے پیزا بنانے کی تربیت بھی حاصل کی ہے۔ ان کا ارادہ ہے کہ اب وہ لندن میں اپنا پیزا بزنس شروع کریں۔ ذبیح اللہ اس وقت لندن میں دو سالہ ویزے پر موجود ہیں اور کاروباری سپانسرشپ کی تلاش میں ہیں تاکہ مستقل بنیادوں پر یہاں کام کر سکیں۔

ان کی کامیابی پر نہ صرف ان کے والدین بلکہ دوست احباب اور اہلِ علاقہ بھی بے حد خوش ہیں۔ حضرت خان نامی قریبی دوست کا کہنا تھا کہ "ذبیح اللہ نے یہ ثابت کیا ہے کہ کوئی کام چھوٹا نہیں ہوتا، بس نیت بڑی ہونی چاہیے۔” ذبیح اللہ کی زندگی یقیناً پاکستان کے نوجوانوں کے لیے ایک مثالی کامیابی کی داستان ہے، جو یہ سکھاتی ہے کہ محنت، حوصلہ اور خواب دیکھنے کی ہمت ہو تو کچھ بھی ناممکن نہیں۔