اچھے اور برے وقت میں ہمیشہ پاکستان کے ساتھ کھڑے رہیں گے: ترک صدر رجب طیب اردوان

ترکیہ کے صدر رجب طیب اردوان نے پاکستان کے ساتھ لازوال دوستی اور اخوت کے جذبے کا اعادہ کرتے ہوئے کہا ہے کہ ترکیہ اچھے اور برے وقت میں ہمیشہ پاکستان کے ساتھ کھڑا رہے گا۔ ذرائع کے مطابق ترک صدر نے سماجی رابطے کی ویب سائٹ "ایکس” (سابقہ ٹوئٹر) پر جاری اپنے بیان میں وزیراعظم شہباز شریف کو "قیمتی بھائی” کہہ کر مخاطب کیا اور پاکستان سے دلی محبت کا اظہار کیا۔

اپنے پیغام میں صدر اردوان نے لکھا:

"ترکی اور پاکستان کے درمیان اخوت اور بھائی چارہ، سچی دوستی کی بہترین مثالوں میں سے ایک ہے۔ یہ برادرانہ تعلق دنیا کے چند ہی ممالک کو نصیب ہوتا ہے۔ آپ کے ذریعے میں اپنے دوست اور بھائی پاکستان کو اپنی دلی محبت کے ساتھ سلام پیش کرتا ہوں۔”

ترک صدر نے مزید کہا کہ ترکیہ، پاکستان کے امن، سکون اور استحکام کو بہت اہمیت دیتا ہے۔ انہوں نے پاکستانی قیادت کی اس پالیسی کو سراہا جو مکالمے، مصالحت اور دانشمندی کے ذریعے تنازعات کے حل کو ترجیح دیتی ہے۔

صدر اردوان نے اپنے پیغام کے آخر میں یقین دہانی کرائی:

"ہم اچھے اور برے وقت میں ہمیشہ آپ کے ساتھ کھڑے رہیں گے۔ ترکیہ ماضی کی طرح مستقبل میں بھی پاکستان کے ساتھ کھڑا رہے گا۔”