انسداد دہشت گردی عدالت میں سانحہ 9 مئی سے متعلق 13 مقدمات کی سماعت جج امجد علی شاہ کے روبرو ہوئی، جس میں وکلائے صفائی، پراسیکیوٹرز اور نامزد ملزمان پیش ہوئے۔ اس موقع پر عدالت میں سکیورٹی کے سخت انتظامات کیے گئے اور پولیس کی بھاری نفری تعینات رہی۔
سماعت کے دوران پی ٹی آئی کے بانی چیئرمین عمران خان اور سابق وزیر خارجہ شاہ محمود قریشی کی جیل روبکار کے ذریعے حاضری لگائی گئی، جبکہ شیخ رشید احمد اور عمران خان کے وکیل فیصل ملک بھی عدالت میں پیش ہوئے۔ عدالت میں موجود دیگر ملزمان کو مقدمات کی نقول فراہم کی گئیں۔ عدالت نے تمام مقدمات کی آئندہ سماعت 25 اپریل تک ملتوی کرتے ہوئے اعلان کیا کہ مذکورہ 13 کیسز میں آئندہ تاریخ پر فردِ جرم عائد کی جائے گی۔
