نشہ کرنے والوں کے لیے پنجاب میں کوئی جگہ نہیں، وزیراعلیٰ مریم نواز کی انسداد منشیات فورس کا اعلان، عظمیٰ بخاری کا دوٹوک پیغام

لاہور (ایم وائے کے نیوز ٹی وی) پنجاب حکومت نے منشیات کے خلاف ایک بڑا قدم اٹھاتے ہوئے خصوصی انسداد منشیات فورس تشکیل دے دی ہے، جس کا افتتاح وزیراعلیٰ پنجاب مریم نواز نے لاہور میں ایک باوقار تقریب کے دوران کیا۔ وزیر اطلاعات پنجاب عظمیٰ بخاری نے ایک بیان میں واضح کیا ہے کہ "نشہ کرنے والوں کی پنجاب میں اب کوئی جگہ نہیں رہی”۔

عظمیٰ بخاری نے سوشل میڈیا پلیٹ فارم "ایکس” (سابقہ ٹوئٹر) پر جاری بیان میں کہا کہ انسداد منشیات کے لیے وزیراعلیٰ پنجاب کی قیادت میں جو قدم اٹھایا گیا ہے وہ ایک تاریخی اقدام ہے۔ انہوں نے بتایا کہ خصوصی کاؤنٹر نارکوٹکس فورس تیار ہو چکی ہے جو منشیات فروشوں اور استعمال کرنے والوں کے خلاف بھرپور کارروائی کرے گی۔ وزیراعلیٰ مریم نواز نے فورس کی لانچنگ تقریب سے خطاب کرتے ہوئے جوانوں کو ہدایت کی کہ وہ دیانتداری سے کام کریں، کسی بھی قسم کی لالچ سے دور رہیں، اور بہادری سے اپنے فرائض انجام دیں۔ ان کا کہنا تھا کہ "مجھے بہادر لوگ پسند ہیں اور میں ان کی عزت کرتی ہوں۔”

انہوں نے اس بات پر زور دیا کہ پنجاب کے دیرینہ مسائل اب مصلحتوں کی نذر نہیں ہوں گے، بلکہ ان کا دوٹوک اور سخت فیصلوں سے سامنا کیا جائے گا۔ مریم نواز نے یہ بھی کہا کہ معاشرے کو منشیات سے پاک کرنا صرف حکومت نہیں، بلکہ ہر شہری کی اجتماعی ذمہ داری ہے۔ ان کے مطابق نئی فورس نہ صرف منشیات فروشوں کے خلاف کریک ڈاؤن کرے گی بلکہ تعلیمی اداروں اور نوجوان نسل کو نشے کے چنگل سے بچانے کے لیے آگاہی مہمات بھی چلائے گی۔  یہ فورس جدید تربیت یافتہ اہلکاروں پر مشتمل ہوگی، جنہیں تکنیکی سازوسامان، ٹریسنگ ٹیکنالوجی اور قانونی اختیارات بھی فراہم کیے جا رہے ہیں تاکہ وہ منشیات کے نیٹ ورکس کو جڑ سے اکھاڑ پھینک سکیں۔ عظمیٰ بخاری کا کہنا تھا کہ وزیراعلیٰ مریم نواز کی قیادت میں پنجاب ترقی، شفافیت اور قانون کی عملداری کی راہ پر گامزن ہو چکا ہے، اور اب نشہ، جرم اور مافیاز کے لیے اس صوبے میں کوئی جگہ نہیں بچی۔