محرم الحرام کا چاند کب نظر آئے گا؟ سپارکو نے پیش گوئی کردی

اسلام آباد (ایم وائے کے نیوز ٹی وی): پاکستان میں نئے اسلامی سال 1447 ہجری کا آغاز 27 جون 2025ء بروز جمعہ ہونے کا امکان ہے، کیونکہ فلکیاتی ماہرین نے محرم الحرام کے چاند کے 26 جون کی شام نظر آنے کی پیش گوئی کی ہے۔ پاکستان کی خلائی تحقیقاتی ادارہ سپارکو (SUPARCO) کے ترجمان نے بتایا ہے کہ فلکیاتی حسابات کے مطابق چاند کی پیدائش 25 جون کو پاکستانی وقت کے مطابق سہ پہر 3 بج کر 32 منٹ پر متوقع ہے۔

سپارکو کے مطابق چاند کی عمر 26 جون کی شام غروب آفتاب کے وقت تقریباً 28 گھنٹے اور 15 منٹ ہوگی، جو چاند نظر آنے کے لیے کافی ہے۔ اگر اس دن موسم صاف رہا تو پاکستان کے مختلف علاقوں میں محرم الحرام کا چاند واضح طور پر دیکھا جا سکے گا، جس کے بعد اسلامی سال 1447 ہجری کا آغاز 27 جون بروز جمعہ ہوگا۔ (ایم وائے کے نیوز ٹی وی) کے مطابق ملک بھر میں یوم عاشورہ، یعنی 9 اور 10 محرم، ہفتہ 5 جولائی اور اتوار 6 جولائی 2025ء کو منائے جانے کا قوی امکان ہے۔ یہ ایام پاکستان سمیت دنیا بھر کے مسلمانوں کے لیے مذہبی اہمیت کے حامل ہیں اور ان دنوں میں مجالس، جلوس اور دیگر عزاداری کی تقریبات کا انعقاد کیا جاتا ہے۔

واضح رہے کہ نئے ہجری سال کے چاند کی شرعی رویت کے لیے مرکزی رویت ہلال کمیٹی کا اجلاس 25 جون کو بلوچستان کے دارالحکومت کوئٹہ میں چیئرمین مولانا عبد الخبیر آزاد کی زیر صدارت ہوگا، جبکہ دیگر شہروں میں زونل رویت ہلال کمیٹیوں کے اجلاس بھی طلب کیے گئے ہیں۔ ان اجلاسوں میں ملک بھر سے موصول ہونے والی شہادتوں کا جائزہ لیا جائے گا، اور چاند کی شرعی رویت کی تصدیق کے بعد سرکاری اعلان کیا جائے گا۔