وفاقی کابینہ میں توسیع: نئے وزرا کی حلف برداری آج ہوگی

اسلام آباد: وفاقی کابینہ میں توسیع کا فیصلہ کر لیا گیا، جس کے تحت نئے وزرا کی حلف برداری کی تقریب آج شام 5 بجے ایوان صدر میں منعقد ہوگی۔ ذرائع کے مطابق حلف برداری کی تقریب کے تمام انتظامات مکمل کر لیے گئے ہیں اور اس موقع پر شرکت کے لیے دعوت نامے بھی جاری کر دیے گئے ہیں۔

ذرائع کے مطابق ڈاکٹر طارق فضل چودھری، حنیف عباسی، خالد مگسی، مصطفیٰ کمال وفاقی وزیر کا حلف اٹھائیں گے، ڈاکٹر طارق فضل چودھری کو وزیر صحت لگائے جانے کا امکان ہے۔  حنیف عباسی کو ریلوے کا قلمدان تفویض کیا جائے گا، خالد مگسی کو مواصلات اور مصطفیٰ کمال کو سائنس و ٹیکنالوجی کی وزارت ملے گی۔

حکومتی ذرائع کے مطابق کابینہ میں یہ توسیع ملکی ترقی اور حکومتی امور کو مزید مؤثر طریقے سے چلانے کے لیے کی جا رہی ہے۔ مزید تبدیلیوں کا امکان بھی موجود ہے، تاہم اس کا دار و مدار حکومتی پالیسی اور مستقبل کے فیصلوں پر ہوگا۔