پنجاب میں گاڑیوں اور موٹر سائیکلوں کی رجسٹریشن فیس بڑھانے کا فیصلہ

لاہور (ایم وائے کے نیوز) – نئے مالی سال کے بجٹ میں عوام کے لیے ایک اور ممکنہ پریشان کن خبر سامنے آ گئی ہے، جو خاص طور پر ان افراد کو متاثر کرے گی جو گاڑی یا موٹر سائیکل خریدنے کا ارادہ رکھتے ہیں۔ ایکسائز، ٹیکسیشن اینڈ نارکوٹکس کنٹرول ڈیپارٹمنٹ کی جانب سے گاڑیوں اور موٹر سائیکلز کی رجسٹریشن فیس میں بھاری اضافے کی تجاویز پیش کی گئی ہیں، جس کا باضابطہ اطلاق آئندہ بجٹ میں متوقع ہے۔

ذرائع کے مطابق 1000 سی سی تک گاڑی کی رجسٹریشن فیس جو اس وقت 1200 روپے ہے، اسے بڑھا کر 5000 روپے کرنے کی تجویز دی گئی ہے۔ اسی طرح 1000 سی سی سے 1800 سی سی تک گاڑیوں کی رجسٹریشن فیس میں زبردست چھلانگ لگاتے ہوئے اسے 2000 روپے سے بڑھا کر 11000 روپے تک لے جانے کی تجویز سامنے آئی ہے۔ 1800 سی سی سے زائد کی گاڑیوں کی رجسٹریشن فیس بھی 3000 سے بڑھا کر 22000 روپے تک کرنے کا منصوبہ بنایا جا رہا ہے۔ یہی نہیں، ہیوی ٹرانسپورٹ وہیکلز (HTV) کی رجسٹریشن فیس بھی 4000 روپے سے بڑھا کر 11000 روپے تک لے جانے کی تجویز شامل کی گئی ہے، جس سے تجارتی طبقے پر بھی مالی دباؤ مزید بڑھ جائے گا۔

تجاویز پر حتمی فیصلہ بجٹ اجلاس میں متوقع ہے، اور عوام کی نظریں اس وقت حکومت کے ممکنہ فیصلے پر جمی ہوئی ہیں کہ آیا اس مالی دباؤ کو کچھ کم کیا جائے گا یا یہ نئے مالی سال کی تلخ حقیقت بن کر سامنے آئے گا۔