اسلام آباد ہائی کورٹ نے بغیر ایم ٹیگ یا کم بیلنس والی گاڑیوں سے 50 فیصد اضافی ٹول ٹیکس وصول کرنے پر عائد عبوری پابندی میں توسیع کر دی ہے۔
اضافی ٹول ٹیکس کے نوٹیفکیشن کے خلاف درخواست کی سماعت کے دوران نیشنل ہائی وے اتھارٹی (NHA) نے اپنا تحریری جواب عدالت میں جمع کرایا۔
سماعت کے دوران جسٹس ارباب محمد طاہر نے درخواست گزار کے وکیل سے استفسار کیا کہ آیا انہیں جواب کی نقل موصول ہو گئی ہے، جس پر وکیل نے بتایا کہ کاپی ابھی ملی ہے اور اسے پڑھنے کا موقع نہیں ملا۔
این ایچ اے کے وکیل نے مؤقف اختیار کیا کہ اسی نوعیت کا ایک اور مقدمہ بھی زیرِ سماعت ہے اور دونوں کو یکجا کیا جائے، تاہم عدالت نے قرار دیا کہ دونوں الگ الگ مقدمات ہیں۔
عدالت نے آئندہ سماعت تک 50 فیصد اضافی ٹول ٹیکس وصول نہ کرنے کے عبوری حکم میں توسیع کرتے ہوئے سماعت ملتوی کر دی۔
