پٹرولیم ڈیلرز ایسوسی ایشن دو دھڑوں میں تقسیم، ایک گروپ کا 15 اگست کو ہڑتال کا اعلان
لاہور: پٹرولیم مصنوعات کی قیمتوں کے روزانہ کی بنیاد پر تعین اور ڈیلرز کے مارجن میں اضافے کے معاملے پر پٹرولیم ڈیلرز ایسوسی ایشن دو گروپوں میں تقسیم ہوگئی۔
ایکسپریس نیوز کے مطابق چیئرمین ملک خدا بخش نے 15 اگست سے ہڑتال کا اعلان کرتے ہوئے گڈز ٹرانسپورٹرز کے ساتھ اظہار یکجہتی کیا ہے۔ ان کا کہنا ہے کہ وہ ٹرانسپورٹرز کے ساتھ کھڑے ہیں۔
دوسری جانب سینٹرل پنجاب اور خیبر پختونخوا سمیت پٹرول پمپس اونرز ایسوسی ایشن نے ہڑتال سے لاتعلقی کا اظہار کرتے ہوئے ہڑتال میں شامل نہ ہونے کا فیصلہ کیا ہے۔ اس گروپ نے گڈز ٹرانسپورٹرز کا ساتھ دینے سے بھی انکار کردیا۔
پٹرولیم ڈیلرز ایسوسی ایشن پنجاب اور خیبر پختونخوا کے مرکزی رہنماؤں کا کہنا ہے کہ ہڑتال کے حوالے سے ان سے نہ کوئی اجلاس کیا گیا اور نہ مشاورت کی گئی۔ ان کے مطابق اچانک ہڑتال کا اعلان کردیا گیا، حالانکہ ایسے فیصلے میں تمام فریقوں کو ساتھ لے کر چلنا ضروری ہے۔
ملک خدا بخش نے کہا کہ مشاورت کرنا کمیٹی کا کام ہے، صرف چیئرمین کا نہیں۔ ان کا کہنا تھا کہ یہ ممکن نہیں کہ مشاورت نہ کی گئی ہو، اور وہ اپنے اعلان پر قائم ہیں۔
انہوں نے کہا کہ ہفتے کو ہڑتال ہوگی، تاہم اگر اس سے پہلے حکومت کے ساتھ کوئی قابلِ قبول راستہ نکل آیا یا حکومت نے تحریری طور پر یقین دہانی کرائی تو صورتحال مختلف ہوسکتی ہے۔
