مزار قائد پر گارڈز کی تبدیلی کی پروقار تقریب، نیول اکیڈمی کے کیڈٹس نے ذمہ داریاں سنبھال لیں
کراچی: پاکستان کے 79ویں جشنِ آزادی کے موقع پر مزار قائد پر گارڈز کی تبدیلی کی پروقار تقریب منعقد ہوئی، جس میں پاکستان نیول اکیڈمی کے چاق و چوبند کیڈٹس نے اعزازی گارڈز کے فرائض سنبھال لیے۔
ملک بھر میں 79واں یومِ آزادی قومی جوش و جذبے کے ساتھ منایا جا رہا ہے۔ دن کا آغاز توپوں کی سلامی سے ہوا، جبکہ نمازِ فجر میں ملکی ترقی، اتحاد، امن اور خوشحالی کے لیے خصوصی دعائیں بھی کی گئیں۔
کراچی میں بانیٔ پاکستان قائداعظم محمد علی جناح کے مزار پر گارڈز کی تبدیلی کی تقریب میں پاکستان نیول اکیڈمی کے کیڈٹس نے اعزازی گارڈز کی ذمہ داریاں سنبھالیں۔ ہر سال 14 اگست کو پاکستان نیول اکیڈمی کے کیڈٹس یہ اعزاز حاصل کرتے ہیں۔
مزار قائد پر پاک بحریہ کے اعزازی گارڈز دو دستوں پر مشتمل ہوتے ہیں، جن میں ایک دستہ پاک بحریہ کے سیلرز جبکہ دوسرا پاکستان نیول اکیڈمی کے کیڈٹس پر مشتمل ہوتا ہے۔
تقریب کے مہمانِ خصوصی کمانڈنٹ پاکستان نیول اکیڈمی ریئر ایڈمرل محمد عمیر نے مزار قائد پر پھولوں کی چادر چڑھائی اور فاتحہ خوانی کی۔
