سوات؛ گاڑی بریک فیل ہونے سے بے قابو ہو کر کھائی میں جاگری، خاتون سمیت 3افراد جاں بحق

سوات: فیلڈر گاڑی کھائی میں جاگری، خاتون سمیت 3 افراد جاں بحق

سوات کے علاقے منگلور شالدرہ میں فیلڈر گاڑی بریک فیل ہونے کے باعث بے قابو ہوکر کھائی میں جاگری، جس کے نتیجے میں خاتون سمیت 3 افراد جاں بحق ہوگئے۔

ریسکیو 1122 سوات کے ترجمان کے مطابق گاڑی میں مجموعی طور پر 10 افراد سوار تھے، جن میں خواتین اور بچے بھی شامل تھے۔

حادثے کی اطلاع ملتے ہی ریسکیو 1122 کی ٹیمیں موقع پر پہنچ گئیں اور زخمیوں کو ابتدائی طبی امداد فراہم کی۔

ریسکیو حکام کے مطابق حادثے میں 4 شدید زخمیوں کو ایمبولینسز کے ذریعے سینٹرل اسپتال سیدو منتقل کردیا گیا، جبکہ 3 بچوں کو مقامی گاڑی کے ذریعے منگلور اسپتال منتقل کیا گیا۔