لاہور الیکٹرک سپلائی کمپنی (لیسکو) نے 2 لاکھ 97 ہزار سنگل فیز اے ایم آئی سمارٹ میٹرز خریدنے کا عمل شروع کر دیا، جس پر تقریباً 5 ارب روپے خرچ ہونے کا امکان ہے۔
ذرائع کے مطابق نئے کنکشن حاصل کرنے والے صارفین کو اے ایم آئی سمارٹ سنگل فیز میٹرز فراہم کیے جائیں گے، جبکہ نیپرا کی جانب سے بجٹ کی منظوری کے بعد ڈیفیکٹو میٹرز کو بھی مرحلہ وار سمارٹ میٹرز سے تبدیل کیا جائے گا۔
ذرائع کا کہنا ہے کہ لیسکو کے پاس روایتی سٹیٹک میٹرز کا بھی بھاری اسٹاک موجود ہے، جنہیں فی الحال خراب یا جل جانے والے میٹرز کی جگہ استعمال کیا جا رہا ہے۔
لیسکو حکام کے مطابق اے ایم آئی سمارٹ میٹرز کی خریداری بجلی کے میٹرنگ نظام کو جدید بنانے کی کوششوں کا حصہ ہے۔ جدید میٹرز کے ذریعے بجلی کے استعمال کی بہتر نگرانی اور میٹر ریڈنگ کے نظام کو مزید مؤثر بنانے میں مدد ملے گی۔
