پاکستان میں 3 نئی ایس یو ویز متعارف کرانے کی تیاری

(ویب ڈیسک) معروف چینی آٹو برانڈ Geely نے پاکستان میں ایک ساتھ 3 نئی SUVs متعارف کرانے کی تیاریاں شروع کر دیں۔

میڈیا رپورٹس کے مطابق نئی SUVs میں 2 مکمل الیکٹرک جبکہ ایک ہائبرڈ گاڑی شامل ہوگی۔ تاہم کمپنی نے فی الحال ان ماڈلز کے نام، قیمتوں اور مکمل فیچرز کی تفصیلات ظاہر نہیں کیں۔

بیسٹ وے آٹوموٹیو کے گروپ مینجنگ ڈائریکٹر محمد عرفان انور شیخ کے مطابق کمپنی پاکستان میں Geely Auto کی باقاعدہ نمائندہ اور مجاز ڈسٹری بیوٹر ہے۔ Geely پاکستان میں اپنی ابتدائی لائن اپ کو نیو انرجی SUVs تک محدود رکھے گی، جس کے تحت 3 گاڑیوں میں سے 2 مکمل الیکٹرک جبکہ تیسری SUV ہائبرڈ پاور ٹرین کے ساتھ پیش کی جائے گی۔

کمپنی کے مطابق گاڑیوں کی بکنگ 2026 کے اختتام سے قبل شروع ہونے کی توقع ہے، جس کے بعد صارفین کو ماڈلز، قیمتوں اور ڈرائیونگ رینج سے متعلق مزید تفصیلات فراہم کی جائیں گی۔

Bestway Automotive کا منصوبہ صرف گاڑیوں کی درآمد تک محدود نہیں بلکہ پاکستان میں Geely گاڑیوں کی مقامی اسمبلنگ بھی شروع کرنے کا ارادہ ہے۔ اس مقصد کے لیے کمپنی نے حال ہی میں ایک موجودہ CKD مینوفیکچرنگ پلانٹ حاصل کیا ہے، جسے مستقبل میں Geely گاڑیوں کی مقامی اسمبلنگ کے لیے استعمال کرنے کی منصوبہ بندی کی گئی ہے۔

یوں پاکستان میں Geely کا سفر ابتدائی طور پر درآمد شدہ گاڑیوں سے شروع ہوگا، تاہم مستقبل میں کمپنی مقامی اسمبلنگ اور پیداوار کی جانب بھی پیش رفت کر سکتی ہے، جس سے گاڑیوں کی دستیابی، قیمتوں اور مقامی آٹو انڈسٹری پر ممکنہ اثرات مرتب ہو سکتے ہیں۔