نجیہہ علوی انجری کے باعث ویمنز ٹی ٹوئنٹی ایشیا کپ سے باہر ہوگئیں، ان کی جگہ صدف شمس کو پاکستان ویمنز ایشیا کپ اسکواڈ میں شامل کرلیا گیا۔
پاکستان کرکٹ بورڈ (پی سی بی) کے مطابق نجیہہ علوی بائیں گھٹنے میں تکلیف کے باعث ان فٹ قرار دی گئی ہیں۔ پی سی بی میڈیکل پینل کے معائنے کے بعد انہیں 3 سے 4 ہفتے آرام کا مشورہ دیا گیا ہے۔
پی سی بی کے مطابق نجیہہ علوی کے ری ہیب پروگرام مکمل ہونے کے بعد دوبارہ طبی معائنہ کیا جائے گا، جس کے بعد ان کی انجری کی صورتحال کا جائزہ لیا جائے گا۔
دوسری جانب سلیکشن کمیٹی نے صدف شمس کو نجیہہ علوی کے متبادل کے طور پر ایشیا کپ اسکواڈ میں شامل کرنے کی منظوری دے دی ہے۔
واضح رہے کہ ویمنز ٹی ٹوئنٹی ایشیا کپ 28 اگست سے 13 ستمبر تک دبئی میں کھیلا جا رہا ہے۔ پاکستان ویمنز ٹیم گروپ اے میں بھارت، تھائی لینڈ اور ہانگ کانگ کے ساتھ شامل ہے۔
