اسلام آباد: بیرونِ ملک تعلیم و تربیت سے واپس آنے والے سول سرونٹس کیلئے نئی سخت شرائط نافذ

اسلام آباد: اسٹیبلشمنٹ ڈویژن نے بیرونِ ملک اور ملک کے اندر تعلیمی پروگراموں، وظائف اور ڈیپوٹیشن سے واپس آنے والے سول سرونٹس کیلئے ڈگریوں کی تصدیق اور مالی ضمانتوں کی کڑی نگرانی سے متعلق نئی لازمی شرائط عائد کردی ہیں۔

نئے جاری کردہ ایس او پیز کے تحت سرکاری خرچ پر بیرونِ ملک تربیت اور تعلیمی پروگراموں میں شرکت کو غیر معینہ مدت کی رخصت تصور نہیں کیا جائے گا، جبکہ قواعد کی خلاف ورزی پر ملازمت اور مالی معاملات میں سخت کارروائی کی جائے گی۔

نئے سرکلر کے مطابق تعلیمی رخصت یا بیرونِ ملک اسکالرشپ سے واپس آنے والے افسران کیلئے لازم ہوگا کہ وہ جوائننگ رپورٹ کے ساتھ ڈگری یا سرٹیفکیٹ کی مصدقہ نقل یا سرکاری تعلیمی ٹرانسکرپٹ جمع کرائیں۔

اگر کوئی افسر معقول اور قابلِ تصدیق وجہ کے بغیر ڈگری جمع کرانے میں ناکام رہتا ہے تو اسے باضابطہ طور پر ڈیوٹی سے غیر حاضر تصور کیا جائے گا۔ غیر ملکی یونیورسٹی کی جانب سے ڈگری کے اجرا میں تاخیر کی صورت میں افسر کو ایسی قابلِ تصدیق دستاویزات فراہم کرنا ہوں گی جو اس کی تعلیمی کارکردگی اور ڈگری میں تاخیر کی جائز وجہ ثابت کریں، بصورتِ دیگر اسے دوبارہ ڈیوٹی جوائن کرنے کی اجازت نہیں دی جائے گی۔

دستاویزات جمع ہونے کے بعد ڈگری اور جوائننگ رپورٹ فوری طور پر اسٹیبلشمنٹ ڈویژن کے ٹریننگ ونگ کو بھیجی جائیں گی تاکہ مرکزی ریکارڈ کو اپ ڈیٹ رکھا جاسکے۔

دوسری جانب سرکاری خرچ پر دیے جانے والے وظائف اور پیشہ ورانہ تربیتی پروگراموں کے مالی معاملات کی نگرانی بھی سخت کردی گئی ہے۔ اس مقصد کیلئے ضمانتی بانڈ پر دستخط کرنے والے ہر افسر کے مالی واجبات کا مرکزی بیان تیار کیا جائے گا۔

ٹریننگ ونگ ایگزیکٹو ونگ کو وظیفے اور تربیت کی اصل لاگت سمیت افسر کو ادا کی گئی قابلِ واپسی رقوم کی تفصیلات فراہم کرنے کا پابند ہوگا۔ مالی واجبات کے بیان میں افسر کی لازمی مدتِ ملازمت، ضمانتی بانڈ کی خلاف ورزی کی شرائط اور قابلِ وصول جرمانے کی رقم بھی درج ہوگی۔

اسٹیبلشمنٹ ڈویژن کے مطابق مالی واجبات کا یہ بیان افسر کی ذاتی فائل کا مستقل حصہ ہوگا اور ملازمتی معاملات سے متعلق انتظامی فیصلوں کے وقت اسے مجاز حکام کے سامنے پیش کرنا لازم ہوگا۔

نئے قواعد کے تحت منظور شدہ رخصت، تعلیمی رخصت یا ڈیپوٹیشن میں توسیع کیلئے درخواست دینا مسلسل غیر حاضری کا جواز نہیں بنے گا۔ افسران کو منظور شدہ مدت مکمل ہوتے ہی ڈیوٹی پر رپورٹ کرنا ہوگا، چاہے توسیع کی درخواست ابھی منظوری کی منتظر ہو۔

جوائننگ رپورٹ جمع نہ کرانے کی صورت میں افسر کو بغیر اجازت غیر حاضر تصور کیا جاسکتا ہے جبکہ معاملہ مزید ہدایات کیلئے اعلیٰ حکام کو بھیجا جاسکے گا۔