ارشد ندیم کی کامیابی،مسلح افواج کے سربراہان نے قومی ہیرو کو مبارکباد دی
راولپنڈی: پاکستان کے مسلح افواج کے سربراہان نے پیرس اولمپکس میں گولڈ میڈل جیتنے اور تاریخی کامیابی حاصل کرنے پر ارشد ندیم کو مبارکباد پیش کی ہے۔
پاک فوج کے شعبہ تعلقات عامہ (آئی ایس پی آر) کے مطابق، مسلح افواج کے سربراہان اور چیئرمین جوائنٹ چیفس آف اسٹاف کمیٹی نے اپنے پیغامات میں ارشد ندیم کی اس شاندار کامیابی پر اُن کی محنت، عزم اور ملک کے لیے دی گئی خدمات کو سراہا ہے۔
آئی ایس پی آر کے بیان میں کہا گیا کہ ارشد ندیم نے گولڈ میڈل جیت کر نہ صرف اپنی محنت کا صلہ پایا ہے بلکہ پاکستان کی تاریخ میں ایک نیا باب رقم کیا ہے۔ اُن کی یہ فتح پاکستانی ٹیلنٹ کی عظمت کا مظہر ہے اور انہوں نے ایک قومی ہیرو کی حیثیت سے اپنے مقام کو مزید مضبوط کیا ہے۔
مزید یہ کہ، مسلح افواج کے سربراہان نے کہا کہ ارشد ندیم کی کامیابی نے پاکستانی عوام کے دلوں میں فخر اور خوشی کی لہر دوڑا دی ہے، اور عالمی سطح پر پاکستان کی بہترین صلاحیتوں کو نمایاں کیا ہے۔
یہ تاریخی کامیابی ارشد ندیم کی انتھک محنت اور ملک کے لیے ان کی لگن کا منہ بولتا ثبوت ہے۔
