تین ملکی سیریز: آج پاکستان اور جنوبی افریقا کراچی میں مدمقابل ہوں گے۔

 پاکستان اور جنوبی افریقا کے درمیان میچ آج کراچی میں پاکستانی وقت کے مطابق دوپہر 2 بجے کھیلا جائے گا۔ پاکستانی ٹیم میں دو تبدیلیاں کی گئی ہیں، جن میں کامران غلام کی جگہ سعود شکیل کو شامل کیا گیا ہے جبکہ فاسٹ بولر محمد حسنین بھی اسکواڈ کا حصہ بن گئے ہیں۔ پاکستان الیون میں فخر زمان ، بابر اعظم، سعود شکیل ، محمد رضوان، سلمان آغا، طیب طاہر، خوشدل شاہ، شاہین آفریدی، محمد حسنین، نسیم شاہ اور  ابرار احمد شامل ہیں جبکہ فاسٹ بولر حارث رؤف انجری کے باعث سہ فریقی سیریز کے بقیہ میچز سے باہر ہوگئے ہیں۔ ان کی جگہ عاکف جاوید کو اسکواڈ میں شامل کیا گیا ہے۔

تین ملکی سیریز میں پاکستان کو پہلے میچ میں نیوزی لینڈ کے ہاتھوں 78 رنز سے شکست ہوئی تھی اور دوسرے میچ میں نیوزی لینڈ نے جنوبی افریقا کو 6 وکٹوں سے شکست دی تھی۔