بابراعظم سڑک پر مداحوں سے الجھ پڑے، ویڈیو وائرل

لاہور – قومی کرکٹ ٹیم کے سابق کپتان بابراعظم ایک نئی تنازعے کی زد میں آگئے ہیں۔ سوشل میڈیا پر وائرل ہونے والی ایک ویڈیو میں انہیں سڑک پر نوجوان مداحوں کے ساتھ تلخ کلامی کرتے اور ہاتھا پائی کی سی کیفیت میں دیکھا جا سکتا ہے، جس نے ان کے مداحوں کو حیران اور ناقدین کو مزید متحرک کر دیا ہے۔

ویڈیو، جو سماجی رابطے کی ویب سائٹ ’ایکس‘ (ٹوئٹر) پر تیزی سے پھیل رہی ہے، میں دیکھا جا سکتا ہے کہ بابراعظم کو مداحوں کے ایک گروہ نے گھیر رکھا ہے، اور وہ نہایت برہم انداز میں ان سے کچھ کہہ رہے ہیں۔ اگرچہ ویڈیو میں آواز صاف سنائی نہیں دیتی، لیکن بابراعظم کو ایک مداح کو دھکا دیتے ہوئے دیکھا جا سکتا ہے، جس کے بعد وہ غصے میں اپنی گاڑی کی طرف بڑھتے ہیں۔

یہ واقعہ اس وقت پیش آیا جب بابراعظم دورہ نیوزی لینڈ میں خراب کارکردگی کے بعد بنگلادیش کے خلاف ٹی20 سیریز سے بھی باہر کر دیے گئے۔ ممکنہ طور پر یہ دباؤ اور تنقید ہی ان کے اس ردعمل کی وجہ بنی۔ واقعے کے بعد سوشل میڈیا پر بحث کا طوفان برپا ہے۔ کچھ صارفین بابر کی حمایت میں سامنے آئے ہیں کہ کھلاڑی بھی انسان ہوتے ہیں اور انہیں بھی حد سے زیادہ ذاتی حملے برداشت نہیں ہوتے، جبکہ بہت سے صارفین نے ان کے اس رویے کو غیaر پیشہ ورانہ اور مداحوں کے جذبات کے منافی قرار دیا ہے۔