بھارتی ڈیجیٹل نیوز اداروں کا اوپن اے آئی کے خلاف مقدمہ دائر

بھارتی ڈیجیٹل نیوز اداروں کا اوپن اے آئی کے خلاف مقدمہ

بھارت میں 20 سے زیادہ ڈیجیٹل نیوز اداروں نے مصنوعی ذہانت کی کمپنی اوپن اے آئی کے خلاف مقدمہ دائر کر دیا ہے۔

ان اداروں کا الزام ہے کہ اوپن اے آئی ان کا کاپی رائٹ مواد اجازت کے بغیر استعمال کر رہا ہے، جو ان کے حقوق کے لیے خطرہ ہے۔ 135 صفحات پر مشتمل مقدمے میں کہا گیا ہے کہ اوپن اے آئی نے کئی ممالک کے میڈیا اداروں کے ساتھ شراکت داری کی، لیکن بھارتی اداروں کے ساتھ ایسا کوئی معاہدہ نہیں کیا۔

مقدمہ دائر کرنے والوں میں بھارت کے بڑے صنعتکاروں گوتم اڈانی اور مکیش امبانی کے میڈیا گروپس، انڈین ایکسپریس اور ہندوستان ٹائمز شامل ہیں۔

بھارتی نیوز ایجنسی اے این آئی نے سب سے پہلے پچھلے سال اوپن اے آئی کے خلاف مقدمہ کیا تھا۔

اوپن اے آئی کا کہنا ہے کہ وہ بھارت سے باہر کام کرتی ہے، اس لیے بھارتی عدالت کو ان کے خلاف مقدمہ سننے کا اختیار نہیں۔ کمپنی نے یہ بھی کہا کہ ان کا اے آئی ماڈل انٹرنیٹ پر موجود عوامی مواد کا استعمال کرتا ہے۔

یاد رہے کہ بھارت کے علاوہ کئی دوسرے ممالک میں بھی اوپن اے آئی پر اسی طرح کے مقدمے کیے جا چکے ہیں، جن میں میڈیا ادارے، مصنفین اور موسیقار شامل ہیں، جو اپنے کاپی رائٹ کام کے بغیر اجازت استعمال کیے جانے پر ناراض ہیں۔