فکر یا مداخلت ؟بیٹی کے سر پہ باپ نے کیمرہ لگوا دیا ،دلچسپ ویڈیو وائرل

فکر یا مداخلت ؟بیٹی کے سر پہ باپ نے کیمرہ لگوا دیا ،دلچسپ ویڈیو وائرل

سوشل میڈیا پر ایک منفرد ویڈیو وائرل ہو رہی ہے جس میں ایک لڑکی کے سر پر سی سی ٹی وی کیمرہ لگا ہوا دیکھا جا سکتا ہے۔ ویڈیو نے دیکھنے والوں میں حیرانی اور دلچسپی پیدا کر دی ہے اور ہر کوئی اس والد کی محبت اور فکر پر حیران ہے جس نے اپنی بیٹی کی حفاظت کے لیے یہ قدم اٹھایا۔

لڑکی نے خود اس ویڈیو میں بتایا کہ اس کے والد نے اس کی سیکیورٹی کو یقینی بنانے کے لیے اس کے سر پر کیمرہ لگوایا ہے۔ اس کا مقصد یہ ہے کہ جب وہ گھر سے باہر ہو، تو اس کے والد مسلسل اس کی نگرانی کر سکیں اور اگر کوئی حادثہ یا غیر متوقع صورتحال پیش آ جائے، تو فوری طور پر والد کو اطلاع مل سکے۔

لڑکی نے مزید کہا کہ اس کے والد صاحب کو اس کے ہر قدم کی خبر ہوتی ہے اور یہ عمل اس کی حفاظت کے لیے کیا گیا ہے۔ اس نے مزید بتایا کہ وہ اپنے والد کے اس فیصلے کے خلاف نہیں گئی کیونکہ وہ جانتی ہے کہ یہ سب اس کی حفاظت اور دیکھ بھال کے لیے کیا جا رہا ہے۔

سوشل میڈیا پر یہ ویڈیو وائرل ہونے کے بعد لوگوں نے مختلف آراء کا اظہار کیا۔ کچھ لوگوں نے اس اقدام کو والدین کی بے انتہا محبت اور تحفظ کی علامت قرار دیا، جبکہ کچھ نے اس عمل کو لڑکی کی ذاتی زندگی میں مداخلت سمجھا۔ تاہم، لڑکی نے خود اس بات پر زور دیا کہ وہ اپنے والد کے اس فیصلے سے مطمئن ہے اور اسے اپنی حفاظت کی خاطر قبول کیا ہے۔