صدر بائیڈن کا 2024 صدارتی انتخابات سے دستبرداری اور کملا ہیرس کی حمایت کا اعلان
واشنگٹن: امریکی صدر جو بائیڈن نے 2024 کے صدارتی انتخابات سے دستبردار ہونے کا اعلان کر دیا ہے۔ اپنے سوشل میڈیا بیان میں، جو بائیڈن نے کہا کہ وہ بقیہ مدت میں صدر کے طور پر اپنے فرائض کی تکمیل پر توجہ دیں گے۔
جو بائیڈن نے کہا کہ وہ اس ہفتے قوم سے اپنے فیصلے کے بارے میں بات کریں گے اور یہ فیصلہ پارٹی اور ملک کے بہترین مفاد میں ہے۔ ان کے بیان کے مطابق، "آپ کے صدر کے طور پر خدمات انجام دینا میری زندگی کا سب سے بڑا اعزاز ہے۔”
ذرائع کے مطابق، 81 سالہ بائیڈن پر ڈیموکریٹک پارٹی کی طرف سے دستبرداری کے لیے شدید دباؤ تھا، خاص طور پر ری پبلکن حریف کے ساتھ مباحثے میں ان کی ناقص کارکردگی کے بعد۔
صدر بائیڈن نے صدارتی دوڑ سے دستبرداری کے ساتھ ساتھ امریکی نائب صدر کملا ہیرس کی مکمل حمایت کا اعلان بھی کیا ہے، جو ڈیموکریٹک پارٹی کی صدارتی امیدوار کے طور پر سامنے آئیں گی۔
بتایا جا رہا ہے کہ بائیڈن نے اتوار کو اچانک اپنا فیصلہ تبدیل کیا، حالانکہ ہفتے کی رات تک وہ صدارتی مقابلے کے لیے پوری طرح تیار تھے۔ آج دوپہر کو انہوں نے اپنی ٹیم کو بتایا کہ انہوں نے اپنا ارادہ بدل دیا ہے۔
یہ اعلان ایک ایسے وقت میں سامنے آیا ہے جب ڈیموکریٹک قانون ساز اور پارٹی عہدیدار بائیڈن پر صدارتی دوڑ سے دستبردار ہونے کا دباؤ ڈال رہے تھے۔
