ایمازون کے بانی اور سابق نیوز اینکر کی صدی کی سب سے مہنگی شادی کا وینس میں شاندار آغاز

وینس (ایم وائے کے نیوز ٹی وی): دنیا کے امیر ترین افراد میں شامل ایمازون کے بانی جیف بیزوس اور سابق نیوز اینکر، پائلٹ اور پروڈیوسر لورین سانچز کی شادی کی تقریبات کا آج سے اٹلی کے شہر وینس میں شاندار آغاز ہو چکا ہے۔ اس شادی کو صرف پُرتعیش ہی نہیں بلکہ صدی کی سب سے مہنگی شادی قرار دیا جا رہا ہے، جس پر مبینہ طور پر 56 ملین ڈالر سے زائد کے اخراجات ہوں گے۔

وینس کی خوبصورت آبی گلیوں، قدیم محلات اور لگژری ہوٹلز میں اس شاہانہ تقریب کی تیاریاں کئی ہفتوں سے جاری تھیں، جو اب آخری مرحلے میں داخل ہو چکی ہیں۔ جیف بیزوس (61 سال) اور لورین سانچز (55 سال) پہلے ہی وینس پہنچ چکے ہیں، جہاں آج سے تین روزہ شادی کی تقاریب کا باقاعدہ آغاز ہو چکا ہے۔ ذرائع کے مطابق اس شادی میں دنیا بھر سے 200 انتہائی بااثر شخصیات کو مدعو کیا گیا ہے جن میں سیاسی رہنما، ہالی وڈ اسٹارز، بزنس ٹائیکونز اور خاص طور پر سابق امریکی صدر ڈونلڈ ٹرمپ کی بیٹی ایوانکا ٹرمپ جیسے بڑے نام بھی شامل ہیں۔

شادی کے لیے 30 لگژری واٹر ٹیکسیاں مہمانوں کی آمدورفت کے لیے مختص کی گئی ہیں، جبکہ ہر مہمان پر تقریباً 50 ہزار ڈالر خرچ ہونے کا تخمینہ ہے۔ تقریب میں شرکاء کے لیے مہنگے تحائف، نایاب شرابیں، خصوصی فیشن ملبوسات، آرٹ شوز اور وینس کے روایتی فنون کا اہتمام کیا گیا ہے۔ معروف میگزین Brides.com کے مطابق یہ شادی صرف ایک نجی تقریب نہیں بلکہ جدید سرمایہ دارانہ طرز زندگی کی نمائندہ تقریب ہے، جسے دنیا بھر کی میڈیا انڈسٹری قریب سے مانیٹر کر رہی ہے۔

واضح رہے کہ جیف بیزوس اور لورین سانچز نے 2023 میں منگنی کا اعلان کیا تھا، اور تب ہی سے ان کی شاہانہ شادی خبروں کی زینت بنی ہوئی ہے۔ دونوں شخصیات گزشتہ چند برسوں سے ایک دوسرے کے قریب ہیں اور مختلف سماجی و فلاحی سرگرمیوں میں بھی ایک ساتھ شریک ہو چکی ہیں۔