ریاض ایئرپورٹ کی بندش، پروازیں متبادل ذرائع سے بحال

ریاض: سعودی عرب کے ریاض ایئرپورٹ کی مسلسل 10 روزہ بندش کے بعد کنگ خالد انٹرنیشنل ایئرپورٹ سے منسلک پروازیں متبادل ذرائع سے آپریٹ ہونا شروع ہوگئی ہیں۔

فلائٹ شیڈول کے مطابق سعودی ایئرلائن نے ریاض کے لیے پروازیں جدہ ایئرپورٹ سے چلانا شروع کردی ہیں۔ آج کراچی اور پشاور سے ریاض جانے والی 4 پروازیں جدہ سے آپریٹ ہوں گی، جبکہ پی آئی اے کی بیشتر پروازیں پہلے ہی جدہ اور دمام کے ذریعے چلائی جا رہی ہیں۔

دوسری جانب مختلف روٹس پر پروازوں میں تاخیر کا سلسلہ بھی جاری ہے۔ کراچی سے لاہور کی پی کے 304 اور 305 میں 3 گھنٹے جبکہ کراچی سے اسلام آباد کی پی اے 200 اور 201 میں 4 گھنٹے کی تاخیر ہے۔

کراچی سے ٹورنٹو جانے والی پی کے 783 ساڑھے 6 گھنٹے تاخیر سے 3 بج کر 50 منٹ پر روانہ ہوگی۔

کابل سے اسلام آباد آنے والی 2 پروازیں 7 گھنٹے تاخیر کا شکار ہیں، جبکہ اسلام آباد سے اسکردو کی 4 پروازوں میں ساڑھے 4 گھنٹے اور لاہور سے مسقط جانے والی 2 پروازوں میں 4 گھنٹے تک تاخیر ہے۔