لاہور (ایم وائے کے نیوز) لاہور پولیس نے ایک بڑی کامیابی حاصل کرتے ہوئے اغواء کی گئی 14 سالہ لڑکی کو بروقت کارروائی کرتے ہوئے بازیاب کرا لیا، جبکہ اغواء کار کو گرفتار کر کے متعلقہ تھانے کے حوالے کر دیا گیا۔
ترجمان موبائلز اسکواڈ کے مطابق یہ کارروائی جناح ٹرمینل ناکے پر کی گئی، جہاں ملزم علی رضا ایک نابالغ لڑکی کو زبردستی اپنے ساتھ لے جا رہا تھا۔ لڑکی کی جانب سے شور مچانے پر ناکہ انچارج نے فوری طور پر مداخلت کی اور دونوں کو حراست میں لے لیا۔ ابتدائی تفتیش کے دوران انکشاف ہوا کہ لڑکی کا تعلق ضلع پاکپتن کے علاقے عارفوالہ سے ہے اور اس کے اغواء کی ایف آئی آر تھانہ صدر عارفوالہ میں درج ہے۔ ملزم کے خلاف بھی اسی تھانے میں مقدمہ موجود تھا۔ پولیس نے فوری طور پر پاکپتن پولیس کو اطلاع دی اور بعد ازاں لڑکی سدرہ اور ملزم علی رضا کو قانونی کارروائی کے لیے تھانہ چوہنگ کے حوالے کر دیا گیا۔
ایس پی موبائلز ارسلان زاہد نے ناکہ انچارج اور ان کی ٹیم کی بروقت کارروائی کو سراہتے ہوئے شاباش اور تعریفی اسناد دینے کا اعلان کیا۔ ان کا کہنا تھا کہ شہر کے داخلی و خارجی راستوں پر سخت نگرانی جاری ہے اور جرائم پیشہ عناصر کے لیے کوئی گنجائش نہیں چھوڑی جائے گی
