جڑانوالہ (ایم وائے کے نیوز ٹی وی) — موٹروے ایم تھری پر جڑانوالہ کے قریب ایک انوکھا واقعہ پیش آیا جہاں ایک شہری اپنی اہلیہ کو سروس ایریا پر چھوڑ کر خود گاڑی لے کر روانہ ہو گیا۔ واقعے کی اطلاع موٹروے پولیس کو دی گئی، جس نے فوری کارروائی کرتے ہوئے خاتون کو باحفاظت شوہر کے پاس واپس پہنچا دیا۔
تفصیلات کے مطابق واقعہ اس وقت پیش آیا جب ایک فیملی جڑانوالہ کے قریب موٹروے کے سروس ایریا پر آرام کے لیے رکی۔ ترجمان موٹروے پولیس کے مطابق شوہر جلدی میں گاڑی لے کر روانہ ہو گیا اور سروس ایریا میں موجود اپنی اہلیہ کو وہیں بھول گیا۔ بیوی کو بھولنے کا احساس شوہر کو 20 کلومیٹر کا فاصلہ طے کرنے کے بعد ہوا، جس پر اُس نے فوری طور پر موٹروے پولیس ہیلپ لائن پر رابطہ کیا۔
موٹروے پولیس نے بروقت کارروائی کرتے ہوئے سروس ایریا میں موجود خاتون کو تلاش کیا اور مکمل حفاظت کے ساتھ شوہر کے پاس پہنچا دیا۔ خاتون کی سلامتی سے واپسی کو یقینی بنانے پر زونل کمانڈر ڈی آئی جی نے پٹرولنگ پولیس کی کارکردگی کو سراہتے ہوئے شاباش دی۔
