اسلام آباد (ایم وائے کے نیوز ٹی وی) پاکستان میں جدید ٹیکنالوجی کے استعمال سے تیل اور گیس کی پیداوار میں قابلِ ذکر اضافہ ریکارڈ کیا گیا ہے۔ آئل اینڈ گیس ریگولیٹری اتھارٹی (اوگرا) کے مطابق ملک میں توانائی کے شعبے کو جدید خطوط پر استوار کرتے ہوئے پیداوار بڑھانے میں کامیابی حاصل ہوئی ہے۔
او جی ڈی سی ایل (OGDCL) نے جدید ٹیکنالوجی کے تحت راجیان آئل فیلڈ میں اہم پیش رفت کی ہے جہاں ایک کنویں میں الیکٹریکل سبمرسیبل پمپ (ESP) کامیابی سے نصب کیا گیا ہے۔ اس ٹیکنالوجی کے استعمال کے بعد تیل کی یومیہ پیداوار 820 بیرل سے بڑھ کر 3,100 بیرل ہو گئی ہے، جبکہ گیس کی پیداوار بھی 5 لاکھ مکعب فٹ سے بڑھ کر 10 لاکھ مکعب فٹ روزانہ تک پہنچ گئی ہے۔
او جی ڈی سی ایل کے ترجمان کے مطابق یہ اضافہ صرف ایک کنویں تک محدود نہیں، بلکہ کمپنی نے عالمی معیار کی جدید ٹیکنالوجی کو بروئے کار لاتے ہوئے ملک بھر میں تیل و گیس کے دیگر ذخائر سے بھی پیداوار بڑھانے کی حکمت عملی تیار کر لی ہے۔ ان کا کہنا ہے کہ کمپنی کی کوشش ہے کہ پاکستان کو توانائی کے شعبے میں خودکفیل بنانے کے لیے ٹیکنالوجی کا زیادہ سے زیادہ استعمال کیا جائے۔
