لاہور کے 120 سرکاری اسکولوں میں نامکمل کلاس رومز کی تعمیر دوبارہ شروع کرنے کا فیصلہ
لاہور: پنجاب حکومت نے لاہور کے 120 سرکاری اسکولوں میں نامکمل کلاس رومز کی تعمیر دوبارہ شروع کرنے کا فیصلہ کرلیا۔
ذرائع کے مطابق تھرڈ پارٹی سے منظوری کے بعد نامکمل کلاس رومز کی تعمیر کا کام دوبارہ شروع کردیا گیا ہے، جبکہ 70 سے زائد اسکولوں میں اضافی کلاس رومز بھی تعمیر کیے جارہے ہیں۔
ترجمان کے مطابق کلاس رومز کی تعمیر کا کام پہلے اسکول مینجمنٹ کونسلز کے تحت شروع کیا گیا تھا، تاہم تعمیراتی کام میں نقائص سامنے آنے کے بعد اسے روک دیا گیا تھا۔
اب باقی ماندہ کلاس رومز کی تعمیر اسٹریٹجک مینجمنٹ یونٹ کے تحت مکمل کی جائے گی۔
سی ای او ایجوکیشن اتھارٹی طارق محمود نے نامکمل کلاس رومز کا تعمیراتی کام تین ماہ میں مکمل کرنے کی ہدایت کرتے ہوئے کہا ہے کہ تعمیراتی کام میں معیار پر کسی قسم کا سمجھوتہ نہ کیا جائے۔
