(ایم وائے کے نیوز ٹی وی): عوام پر مہنگائی کا ایک اور وار، حکومت نے پیٹرولیم مصنوعات کی قیمتوں میں اچانک اضافہ کر کے شہریوں کو حیران کر دیا ہے۔ وزارتِ خزانہ کی جانب سے جاری کردہ نوٹیفکیشن کے مطابق پیٹرول اور ڈیزل دونوں کی قیمتوں میں نمایاں اضافہ کر دیا گیا ہے، جس کا اطلاق فوری طور پر کر دیا گیا ہے۔
پیٹرول کی قیمت میں 8 روپے 36 پیسے فی لیٹر کا اضافہ کیا گیا ہے جس کے بعد نئی قیمت 266 روپے 79 پیسے فی لیٹر ہو گئی ہے۔ دوسری جانب ہائی اسپیڈ ڈیزل کی قیمت میں 10 روپے 39 پیسے فی لیٹر کا اضافہ کیا گیا ہے، جس سے نئی قیمت 272 روپے 98 پیسے فی لیٹر ہو چکی ہے۔
ذرائع کے مطابق حکومت نے قیمتوں میں اضافے کے ساتھ ساتھ پیٹرولیم مصنوعات پر نئی کاربن لیوی بھی عائد کر دی ہے، جو عوام کے لیے مزید بوجھ کا باعث بنے گی۔ پیٹرول پر فی لیٹر لیوی کو کم کر کے 75 روپے 52 پیسے مقرر کیا گیا ہے جبکہ ڈیزل پر لیوی 74 روپے 51 پیسے فی لیٹر مقرر کی گئی ہے۔ اس کے علاوہ ڈھائی روپے فی لیٹر اضافی کاربن لیوی بھی شامل کر دی گئی ہے۔
معاشی ماہرین کے مطابق بین الاقوامی منڈی میں خام تیل کی قیمتوں میں اضافے کے ساتھ ساتھ حکومتی محصولات بڑھانے کی حکمت عملی بھی اس مہنگائی کی بڑی وجوہات میں شامل ہے۔ نئی قیمتوں سے اشیائے خور و نوش، ٹرانسپورٹ اور دیگر بنیادی سہولیات پر بھی مہنگائی کا دباؤ مزید بڑھنے کا خدشہ ہے۔
