مرغی کا گوشت سونا بن گیا! قیمت 880 روپے فی کلو تک جا پہنچی، عوام پریشان

مارکیٹ ذرائع کے مطابق صرف ایک دن میں مرغی کے گوشت کی قیمت میں 54 روپے کا اضافہ دیکھنے میں آیا، جس کے بعد یہ 746 سے بڑھ کر 800 روپے ہوگئی۔ تاہم شہر کے بعض علاقوں میں مرغی کا گوشت 880 روپے فی کلو بھی فروخت ہو رہا ہے۔ذرائع کا کہنا ہے کہ مرغی کے گوشت کے سرکاری نرخ 595 روپے فی کلو مقرر ہیں، لیکن رمضان اور عید کے سیزن میں 840 روپے فی کلو تک بھی فروخت کیا جا چکا ہے۔ اب رمضان گزرنے کے بعد بھی قیمتیں آسمان کو چھونے لگی ہیں۔

دوسری جانب سیکرٹری زراعت پنجاب نے مرغی کی قیمتوں پر کنٹرول نہ ہونے اور دو الگ الگ سرکاری نرخ نامے جاری ہونے پر نوٹس لے لیا ہے۔ انہوں نے مارکیٹ کمیٹیوں کے افسران کے خلاف کارروائی اور عوام کو صرف سرکاری ریٹ پر گوشت فراہم کرنے کی ہدایت جاری کی ہے۔شہریوں کا کہنا ہے کہ "مرغی اب ہماری پہنچ سے باہر ہو چکی ہے، یہ غریب کا گوشت تھا، اب لگتا ہے صرف فریزر میں دیکھنے کو ملے گا!”