شمالی وزیرستان میں خوارج کی دراندازی کی کوشش ناکام، سیکیورٹی فورسز کی کارروائی میں 8 خوارجی ہلاک

راولپنڈی: پاک افغان سرحد پر دہشتگردی کی بڑی کوشش کو سیکیورٹی فورسز نے بروقت کارروائی کرتے ہوئے ناکام بنا دیا۔ شمالی وزیرستان کے علاقے حسن خیل میں دراندازی کی کوشش کرنے والے 8 خوارج ہلاک جبکہ 4 زخمی ہو گئے۔

آئی ایس پی آر کے مطابق، خوارج کا ایک گروپ گزشتہ رات افغانستان سے پاکستانی حدود میں داخل ہونے کی کوشش کر رہا تھا۔ تاہم، مستعد سیکیورٹی فورسز نے فوری جوابی کارروائی کرتے ہوئے حملے کو ناکام بنا دیا۔ فوج کے شعبہ تعلقات عامہ (ISPR) کے بیان میں کہا گیا ہے کہ پاکستان بارہا افغان عبوری حکومت سے مؤثر بارڈر منیجمنٹ کا مطالبہ کرتا آیا ہے تاکہ ایسی سرگرمیوں کو روکا جا سکے۔ آئی ایس پی آر نے امید ظاہر کی ہے کہ افغان عبوری حکومت اپنی سرزمین کو پاکستان مخالف دہشتگردی کے لیے استعمال ہونے سے روکنے میں کردار ادا کرے گی۔ ترجمان پاک فوج کے مطابق سیکیورٹی فورسز دہشتگردی کے مکمل خاتمے اور سرحدوں کی حفاظت کے لیے پرعزم ہیں، اور ایسی کسی بھی کوشش کا بھرپور اور مؤثر جواب دیا جائے گا۔