قاتل خواتین کا خوفناک گروہ بے نقاب
آندھرا پردیش، بھارت: بھارتی ریاست آندھرا پردیش میں پولیس نے تین ایسی خواتین کو گرفتار کیا ہے جو لوگوں سے دوستی کا ڈھونگ رچا کر انہیں موت کے گھاٹ اتارتی تھیں۔ ان سفاک خواتین کی گرفتاری نے پورے علاقے میں سنسنی پھیلا دی ہے، اور مقامی میڈیا انہیں "تینالی کی سیریل کلرز” کے نام سے پکار رہا ہے۔پولیس کے مطابق، یہ خواتین موناگپا راجینی، مدیالا وینکیتشوری اور گُلرا رمانامہ نے چار افراد کو اپنی چالاکیوں کا شکار بنا کر ان کی جان لے لی، جبکہ مزید قتل کرنے کی کوششیں بھی کیں۔
تینالی پولیس کے سربراہ سیتش کمار نے میڈیا کو بتایا کہ یہ خواتین اجنبی لوگوں کے ساتھ دوستی کرتیں اور انہیں نشے والے مشروبات پلاتیں جن میں مہلک زہر سائنائیڈ شامل ہوتا تھا۔ یہ زہر پینے والا فوراً موت کا شکار ہو جاتا، جس کے بعد یہ خواتین ان کے قیمتی سامان اور پیسے لوٹ لیتیں۔
پولیس کا کہنا ہے کہ ان خواتین نے حال ہی میں ایک خاتون ناگر بی کو جون میں قتل کیا تھا، اور مزید دو خواتین کو بھی مارنے کی کوشش کی تھی، جو خوش قسمتی سے بچ گئیں۔ ان واقعات کے بعد پولیس نے تحقیقات کا دائرہ وسیع کیا اور بالآخر ان سیریل کلرز کو گرفتار کرنے میں کامیاب رہی۔ پولیس نے خواتین کے قبضے سے سائنائیڈ اور دیگر مہلک کیمیکلز بھی برآمد کیے ہیں۔
تین میں سے ایک ملزمہ، مدیالا وینکیتشوری، کا طویل مجرمانہ ریکارڈ بھی سامنے آیا ہے۔ یہ 32 سالہ خاتون چار سال تک تینالی میں ایک رضاکار کی حیثیت سے کام کرتی رہی اور بعد ازاں کمبوڈیا منتقل ہو گئی، جہاں وہ مبینہ طور پر سائبر کرائم میں ملوث رہی۔ پولیس کو اس بات کا بھی علم ہوا ہے کہ ایک شخص جو ان خواتین کو سائنائیڈ فراہم کرتا تھا، اسے بھی گرفتار کیا جا چکا ہے۔تینالی کے ماضی کے جرائم کی یادیں تازہ:اس کیس نے تینالی میں پرانے دلخراش واقعات کی یادیں تازہ کر دی ہیں، جہاں جولی جوزف نامی ایک خاتون نے سائنائیڈ کے ذریعے 14 برسوں میں 6 افراد کو ہلاک کیا تھا۔
اس واقعے نے بھی مقامی کمیونٹی کو ہلا کر رکھ دیا تھا اور لوگوں کو اجنبیوں سے دوستی کے حوالے سے محتاط ہونے کا پیغام دیا تھا۔پولیس کی وارننگ:پولیس نے اس واقعے کے بعد عوام کو خبردار کیا ہے کہ وہ اجنبی افراد سے محتاط رہیں، ان کے ساتھ غیر ضروری دوستی سے گریز کریں اور اپنے اردگرد کے ماحول پر نظر رکھیں تاکہ کسی بھی قسم کے خطرے سے بچا جا سکے۔ پولیس کا کہنا ہے کہ گرفتار خواتین نے اپنے جرائم کا اعتراف کر لیا ہے، اور مزید تحقیقات جاری ہیں تاکہ اس گروہ کے مزید افراد کا پتہ لگایا جا سکے۔
