کراچی: نوجوان مصطفیٰ عامر کے اغوا اور قتل کیس میں پیش رفت سامنے آئی ہے۔ پولیس نے کراچی کی انسداد دہشتگردی عدالت (ATC) نمبر 2 میں ملزم ارمغان کو میں پیش کیا جو سماعت کے دوران اچانک بے ہوش ہوگیا جس سے کمرہ عدالت میں ہلچل مچ گئی۔ دوران سماعت عدالت نے سوال کیا ملزم کی طرف سے کون آیا ہے؟ اس پر وکیل صفائی نے کہا ملزم سے وکالت نامہ دستخط کروانا ہے مگر ارمغان نے وکالت نامے پر دستخط سے انکار کردیا ہے۔
عدالت نے سوال کیا کہ پولیس نے جب تمہیں گرفتار کیا، اس بارے میں کیا کہتے ہو؟ ملزم ارمغان نے کہا مجھے مارا گیا ہے عدالت نے دریافت کیا کہ لاش مل گئی ہے؟ تفتیشی افسر نے جواب دیا جی ہاں لاش مل گئی ہے اور قبر کشائی کے احکامات بھی جاری ہو چکے ہیں۔ تفتیشی افسر نے عدالت کو بتایا کہ ابھی آلہ قتل برآمد کرنا باقی ہے اور اس کے لیے مزید تفتیش درکار ہے۔ اس پر عدالت نے ملزم ارمغان کو مزید 4 روزہ جسمانی ریمانڈ پر پولیس کے حوالے کردیا۔
مقتول کی والدہ نے عدالت سے قبر کشائی کی درخواست کی تھی جسے منظور کرتے ہوئے عدالت نے حکم دیا تھا کہ میڈیکل بورڈ 7 دن کے اندر رپورٹ پیش کرے۔ اب مقتول کی قبر کشائی کے لیے نوٹیفیکشن جاری کر دیا گیا ہے جس کے مطابق 21 فروری صبح 9 بجے مصطفیٰ عامر کی قبر کشائی ہوگی ۔پولیس سرجن ڈاکٹر سمیہ سید میڈیکل بورڈ کی سربراہی کریں گی اور دیگر ممبران میں ایڈیشنل پولیس سرجن ڈاکٹر سری چند اور ایم ایل او ڈاکٹر کامران شامل ہوں گے
