لاہور ایئرپورٹ پر جعلی پاسپورٹ اور یورپ ویزے کے ساتھ مسافر گرفتار، ایف آئی اے کے حوالے

لاہور: علامہ اقبال انٹرنیشنل ایئرپورٹ پر ایئرپورٹ سیکیورٹی فورس (ASF) نے کارروائی کرتے ہوئے شارجہ جانے والے مسافر کے قبضے سے 5 جعلی پاکستانی پاسپورٹ اور 5 جعلی یورپی ویزے برآمد کر لیے۔ ملزم کو حراست میں لے کر مزید تفتیش کے لیے ایف آئی اے امیگریشن حکام کے حوالے کر دیا گیا.

  ذرائع کے مطابق، شاہدرہ کا رہائشی محمد اظہر  (پاسپورٹ نمبر: EC1843163) علامہ اقبال انٹرنیشنل ایئرپورٹ سے شارجہ روانہ ہونے کے لیے موجود تھا۔ دورانِ چیکنگ شام 7 بجکر 35 منٹ (1935 گھنٹے) پر اے ایس ایف اہلکاروں نے سامان اسکیننگ کے دوران مشکوک اشیاء کی نشاندہی کی۔جب مسافر کے سامان کی مزید تلاشی لی گئی تو اس میں سے 5 جعلی پاکستانی پاسپورٹ اور 5 جعلی یورپی ویزے برآمد ہوئے، جس پر فوری کارروائی کرتے ہوئے ملزم کو گرفتار کر لیا گیا۔

اے ایس ایف نے ملزم کو ابتدائی پوچھ گچھ کے بعد ایف آئی اے امیگریشن حکام کے حوالے کر دیا، جہاں مزید تحقیقات جاری ہیں ذرائع کے مطابق، حکام یہ جاننے کی کوشش کر رہے ہیں کہ جعلی سفری دستاویزات کہاں سے حاصل کیے گئے اور آیا اس کے پیچھے کوئی منظم گروہ سرگرم ہے یا نہیں۔