لاہور: پولیس مقابلے میں خاتون سے زیادتی میں ملوث تین ڈاکو ہلاک، دو فرار

لاہور کے علاقے چوہنگ میں کرائم کنٹرول ڈیپارٹمنٹ (CCD) اور ڈاکوؤں کے درمیان مبینہ پولیس مقابلے میں خاتون سے زیادتی میں ملوث تین ڈاکو ہلاک جبکہ دو فرار ہونے میں کامیاب ہو گئے۔

ڈی ایس پی سی سی ڈی کے مطابق دو موٹر سائیکلوں پر سوار پانچ مشتبہ افراد چوہنگ سے ملتان روڈ کی طرف جا رہے تھے۔ پولیس نے مشکوک حرکات دیکھتے ہوئے انہیں رکنے کا اشارہ کیا تاہم ڈاکوؤں نے رکنے کے بجائے پولیس اہلکاروں پر فائرنگ شروع کر دی۔ جوابی کارروائی میں پولیس نے بھی فائرنگ کی، جس کے نتیجے میں تین ڈاکو مارے گئے۔

پولیس کے مطابق ابتدائی تحقیقات میں انکشاف ہوا ہے کہ ہلاک ہونے والے ڈاکو ایک واردات کے دوران خاتون سے زیادتی میں ملوث تھے۔ تینوں ملزمان اپنے ہی ساتھیوں کی فائرنگ سے ہلاک ہوئے جبکہ باقی دو ملزمان فرار ہو گئے۔ موقع سے پولیس کو اسلحہ اور دیگر مشکوک سامان بھی ملا ہے۔ ہلاک ڈاکوؤں کی شناخت کے لیے کوششیں جاری ہیں جبکہ فرار ملزمان کی گرفتاری کے لیے سرچ آپریشن شروع کر دیا گیا ہے۔ پولیس حکام کا کہنا ہے کہ واقعے کی مکمل تحقیقات جاری ہیں اور مزید حقائق جلد سامنے آئیں گے